Bul týraly Qazaqstan halqy Assambleıasynyń «El birligi – jańarǵan Qazaqstannyń tiregi» atty HHHI sessııasynda Memleket basshysy Qasym-Jomart Toqaev aıtty, dep habarlaıdy Egemen.kz.
«Bir aıdan keıin jańa dıalog alańynyń alǵashqy otyrysy – «Ulttyq quryltaı» ótedi. Quryltaı el damýynyń ózekti máselelerin talqylaý úshin qoǵamdy jumyldyrýǵa arnalǵan. Ol jalpyulttyq dıalogtyń ámbebap modeline aınalady. Quryltaı quramyna depýtattar, Assambleıa músheleri, sarapshylar men quqyq qorǵaýshylar, barlyq óńirlerdiń, sondaı-aq Azamattyq alıanstyń, qoǵamdyq keńesterdiń, úkimettik emes uıymdardyń, bıznes-qaýymdastyqtardyń jáne óndiris salasynyń ókilderi kiredi», dedi Qasym-Jomart Toqaev QHA otyrysynda.
Onyń aıtýynsha, assambleıa Ulttyq quryltaımen birlesip, tıimdi jumys isteýi kerek. Sebebi, túptep kelgende, ekeýiniń maqsaty – ortaq.
«Aýqymdy ózgeristerge jastardyń da belsene qatysqany abzal. Keshe tuńǵysh ret Qazaqstan halqy Assambleıasynyń Jastar sessııasy ótti. Onyń usynymdaryn muqııat zerdeleý qajet», dedi ol.