Memleket basshysy Qasym-Jomart Toqaev 2022 jyldy Balalar jyly dep jarııalady. Prezıdent tapsyrmasyna sáıkes Úkimet is-sharalar josparyn ázirlep, ony Amanat partııasy janyndaǵy Otbasy jáne halyqty áleýmettik qorǵaý máseleleri jónindegi respýblıkalyq qoǵamdyq keńes jan-jaqty saralaǵan bolatyn.
Balalardyń quqyǵyn qorǵaý, joǵaryda aıtylǵan jospardy zerdeleý – Amanat partııasyna artylǵan amanattardyń biri ekeni daýsyz. Osy oraıda partııanyń fraksııa músheleri Dınara Zákıeva men Elnur Beısenbaev baspasóz máslıhatynda birqatar mańyzdy máselege toqtaldy.
Jyl basynan beri óńirlerdegi 147 myń bala qonystanǵan 247 ınternatta jóndeý jumystaryn júrgizý josparlanǵan bolatyn. Al oǵan deıin 130 mekemede osyndaı jumystardy atqarý týraly is-sharalar qabyldanǵan.
Áleýmettik jaǵdaıy nashar otbasylarǵa, balalarǵa keshendi túrde kómek kórsetý jáne jetkinshekterdi zorlyq-zombylyqtan saqtandyrý bılik partııasynyń basty mıssııalarynyń birine aınalǵan. Partııa janynan ashylǵan «111 shuǵyl qyzmetine» sońǵy kezde 25 myńnan astam ótinish túsken. Nátıjesinde, arnaıy qurylǵan jedel áreket etý toptarynyń birlesip atqarǵan jumysynyń arqasynda qıyn jaǵdaıdaǵy 64 myń otbasyna keshendi kómek kórsetilgen. Al «Baqytty otbasy» partııalyq jobasy aıasynda ótken jyly balalar men otbasylarǵa kómek kórsetýge baǵyttalǵan 6 myńnan astam is-shara óz deńgeıinde júrgizilgen.
Baspasóz máslıhatynda Májilis depýtattary Úkimet qaýlysymen bekitilgen Balalar jylyn ótkizý jónindegi is-sharalar josparyn jan-jaqty tarqatyp aıtty. Jalpy jumystardy júıeli túrde atqarý úshin 48,3 mlrd teńge, onyń ishinde 16,7 mlrd teńge respýblıkalyq bıýdjetten qarastyrylǵany belgili. Qujatta qarastyrylǵan 50 tarmaqtyń basym bóligin depýtattar qaıta qaraý qajet dep esepteıdi.
«Mundaǵy josparda shyǵarmashylyq baıqaýlar, balalar lagerlerindegi jazǵy maýsymnyń ashylýy, jıyndar jáne ózge máseleler qamtylǵan. Alaıda qarjyny barlyq balalardyń qoǵamdyq kólikte tegin júrýine, túski aspen qamtamasyz etý sekildi baǵyttarǵa nege paıdalanbasqa?! Týrasyn aıtsaq, balalardyń quqyǵyn qorǵaý salasyndaǵy ýákiletti organ sanalatyn Bilim jáne ǵylym mınıstrliginiń osy baǵyttaǵy jumysy túsiniksiz bolyp tur», dedi Dınara Zákıeva máselege qatysty oıyn bildirip.
Amanat partııasy fraksııasynyń músheleri júıesiz is-sharalarǵa qajetsiz shyǵyndardyń ornyna az qamtylǵan otbasylardaǵy árbir balaǵa ataýly áleýmettik kómek mólsherin 35 myń teńgege deıin arttyrýdyń, ákimdikterde qıyn jaǵdaıdaǵy otbasylarmen jumysty uıymdastyrý úshin otbasy isteri jónindegi basqarmalar qurýdyń qajettigin aıtty. Otbasy ınstıtýtyn nyǵaıtý, otbasyndaǵy qolaısyz jaǵdaıdyń, balalarǵa qatygezdik tanytýdyń aldyn alý jónindegi nysanaly ındıkatorlardy óńirlik damý josparyna engizý jaıynda berilgen usynystar Úkimet tarapynan qoldaý tappaǵany da áńgimege arqaý boldy.
«Jalpy somasy 100 mlrd teńgeden asatyn, óńirler úshin 3-ten 32 mıllıard teńgege deıin qarajat qarastyrylǵan. Alaıda óńirlik josparlar kóńilge qonbaıdy. Kórsetilgen josparlardyń birqatarynda ǵana ınklıýzııany qoldaý kabınetterin, dene shynyqtyrý ortalyqtaryn, aýtızm dertine shaldyqqan balalarǵa arnalǵan ortalyqtardy ashý sekildi mańyzdy is-sharalar qamtylǵan. Bul jospardaǵy mańyzdy is-sharalardyń 35 paıyzynan aspaı tur», dedi depýtat Elnur Beısenbaev.
Baspasóz máslıhatynda depýtattar ózge de mańyzdy máselelerdi sóz etip, olardy sheshý kezek kúttirmeıtinin atap ótti.