Lıftpen joǵaryǵa sharshamaı kóterilgen tamasha-aq. Al tozyǵy jetken lıftti qoldanýdan qorqatyn pavlodarlyqtar da bar. Búginde oblysta 1 967 lıft jumys istep tur. Basym bóligi qoldanysta bolý merzimin áldeqashan ótkerip tastaǵan. Atap aıtsaq, 67 paıyzynyń tozyǵy jetken.
Olqylyqtyń ornyn toltyrý úshin 2020-2025 jyldarǵa arnalǵan «Nurly jer» baǵdarlamasy sheńberinde lıftilerdi jańǵyrtý jumystary jalǵasýda. Lıftilerdiń 420-y Pavlodar qalasynda, 117-i Ekibastuzda, 24-i Aqsý shaharynda ornalasqan. Onyń 1 318-iniń jaǵdaıy máz emes. Bir lıfti kem degende 25 jyl qyzmet etýi tıis. Saldarynan ara-tura isten shyǵyp, turǵyndardyń ómirine qaýip tóndirýde. Sodan bolar, páter ıeleri ákimdikke habarlasyp, jaǵdaıdy retteýge qol ushyn sozýdy suraýda.
Nursultan Nazarbaev dańǵyly, 42-úı mekenjaıy boıynsha ornalasqan úıdiń 10 podezd turǵyndary lıftiniń ábden eskirgenin aıtady. Biraq páter ıeleri «bir jeńnen qol shyǵara almaı otyr». Turǵyndardyń jartysy lıftini jóndeýge yntaly emes. Al jańǵyrtý baǵdarlamasynyń talabyna sáıkes, turǵyndardyń 3/2 bóliginiń kelisimi kerek. Mysal keltirsek, 36 páter ıesiniń kem degende 24-i jóndeý jumystaryn qoldaýy tıis.
Oblystyq energetıka jáne turǵyn úı-kommýnaldyq sharýashylyǵy basqarmasynyń bólim basshysy Nurjan Aldybaevtyń málimetinshe, byltyr 77,195 mln teńgege oblys ortalyǵyndaǵy 8 lıfti jańǵyrtylǵan. Osylaısha, Nursultan Nazarbaev dańǵyly, 81, Máshhúr Júsip kóshesi, 284, Akademık Shókın kóshesi, 31 mekenjaılarynda ornalasqan birneshe podezd turǵyndary baǵdarlamanyń ıgiligin sezinip otyr. Bul maqsatqa qarajat qalalyq bıýdjetten bólinipti. Al «Nurly jer» baǵdarlamasy memlekettik joba ekenin eskersek, lıftini jóndeýge respýblıkalyq bıýdjetten qarjy qarastyrýǵa bolady. Biraq turǵyndar ózara kelisim tappaı júrgendikten, ótinishter de az túsip jatqan kórinedi. Sáıkesinshe, ázirge tek qalalyq bıýdjetten ǵana qarajat jumsalýda.
Pavlodar qalalyq turǵyn úı ınspeksııasy jáne kommýnaldyq sharýashylyq bóliminiń sektor meńgerýshisi Asylbek Jumabekovtiń aıtýynsha, bir lıftini jańǵyrtý úshin shamamen 9-10 mln teńge qarajat qajet.
– Eń áýeli turǵyndar ózderiniń arasynda jıyn ashyp, lıftilerdi jóndeý boıynsha oılaryn ortaǵa salady. Eger basym bóligi kelisimge kelse, hattama toltyrylyp, turǵyn úı ınspeksııasy bólimine joldaıdy. Jobalyq-smetalyq qujatty ázirleýge 45 táýlik ýaqyt ketedi. Al jóndeý jumystary 1 aı ishinde aıaqtalady. Jaýapty operator – «Gorkomhoz Modernızasııa jılıa» JShS-i. Jóndeý jumystary kezinde turǵyndar aı saıyn lıft qyzmeti úshin tóleıtin tólemaqydan bosatylady, – deıdi A.Jumabekov.
Nazarbaev dańǵyly, 81-úıde 2 podezd bar eken. Ekeýiniń de turǵyndary birligin tanytyp, lıftini jóndeýge kelisken. Baǵdarlamanyń tıimdiligi sol, qarajat paıyzsyz negizde beriledi. Turǵyndar jóndeýge jumsalǵan aqshany 7-10 jyl aralyǵynda aı saıyn tólep turýǵa mindetti. Páterdiń aýmaǵyna qaraı ár shańyraq shamamen 2,5-4 myń teńge qarajat tóleýge tıis. Bir atap óterligi, ekinshi qabattyń turǵyndary da jańǵyrtý jumystary úshin tólem jasaýy kerek. Sebebi «Turǵyn úı qatynastary týraly» zańǵa sáıkes poshta jáshigi kireberis, baspaldaq, lıft, shatyr, ınjenerlik júıeler sııaqty kondomınıým obektisiniń ortaq múlkine jatady. Aıtpaqshy, eger páterińizdi satatyn bolsańyz, kelisimshartta úıdiń kelesi ıesi tólemdi jalǵastyrady dep kórsetilgen. Iаǵnı tólem aıaqtalǵanyn kútpeı, úıińizdi alańsyz saýdalaýǵa múmkindik bar.
Pavlodar