«Kóptegen qazaqstandyqtar soǵys jyldarynda kórsetken erlikteri úshin Keńes Odaǵynyń Batyry ataǵyna usynyldy, biraq qandaı da bir sebeptermen basqa marapattarǵa ıe boldy. Muny birqatar muraǵat kózderi, sonyń ishinde qupııasyzdandyrylǵan qujattar rastaıdy». Bul týraly Memlekettik hatshy óziniń telegram arnasynda jazdy.
Táýelsizdik jyldarynda soǵysqa qatysqan toǵyz adamǵa «Halyq qaharmany» ataǵy berildi. Sońǵy ret bul joǵary marapat 2005 jyly ardagerler Máýlen Qalmyrza men Aleksandr Kaporınge berildi, al bir jyl buryn ony bizdiń ataqty ushqysh Hıýaz Dospanova aldy.
Buqaralyq aqparat quraldarynda tarıhshylar men qoǵam qaıratkerleri soǵys batyrlaryna elimizdiń eń joǵary nagradasyn berý qajettiligi týraly birneshe ret aıtqan, olardyń jaýyngerlik eńbegi jalpyǵa birdeı tanyldy. Olar týraly kóptegen maqala men kitap jazylǵan, olardyń esimderi kóshelerge berildi.
«О́tken jyly Prezıdent Qasym-Jomart Toqaev bul máseleni zerdeleýdi tapsyrdy. Olardyń erlikterin rastaıtyn tıisti zertteý jumystary júrgizildi.
Búgin de aıtýly merekeler – Otan qorǵaýshy kúni men Jeńis kúni qarsańynda Prezıdenttiń Jarlyǵymen «Halyq qaharmany» ataǵy maıdanda erekshe erlik pen batyrlyq tanytqan úsh qazaqstandyqqa qaıtys bolǵannan keıin berildi.
Ol – soǵys jyldary úzdik jıyrma mergen qataryna engen aty ańyzǵa aınalǵan Tóleýǵalı Ábdibekov. Fashıster ony «qara ólim» dep atady.
Ol – atqyshtar batalonynyń komandıri Aleksandr Nesmııanov, onyń erligi arqasynda birneshe ret jaý qorǵanysy buzylǵan.
Ol – Mánshúk Mámetovamen birge Nevel qalasynyń mańynda shabýyldardy toıtaryp, áriptesteriniń ketýin jaýyp tastaǵan taǵy bir aty ańyzǵa aınalǵan mergen Ybyraıym Súleımenov.
Bizdiń dańqty otandastarymyzǵa «Halyq qaharmany» ataǵyn berý tarıhı ádilettilikti qalpyna keltirý jáne soǵys jyldaryndaǵy qazaqstandyq jaýyngerlerdiń erlikterin eske alýdy qoǵamdyq sanada nyǵaıtý maqsatyn kózdeıdi», dep atap ótti E.Qarın.