Prezıdent Qasym-Jomart Toqaevtyń Jańa Qazaqstan qurý týraly bastamasyna ún qosyp, «Aq Atash azamattary» qoǵamdyq uıymy balyq salasynda eńbek etken ardagerlerdi ardaqtaý maqsatynda rýhanı-mádenı is-shara ótkizdi.
Oǵan Túpqaraǵan aýdanynyń turǵyndarymen qatar, oblystyń basqa aýdandaryna qonys aýdarǵan balyqshy ardagerler de shaqyryldy. Keshke qaraı qonaqtar jyrshy-ánshiler ónerin tamashalady. Konsertke aýdan kórkemónerpazdarymen birge, oblystan kelgen ónerpazdar da qatysty. Is-sharany «Aq Atash azamattary» qoǵamdyq uıymynyń tóraǵasy Amanǵalı Aqybaev kirispe sóz sóılep ashyp, qonaqtarǵa qosh keldiń aıtty. Sodan keıin ómirden ozǵan balyqshy ardagerlerdiń rýhyna arnap Tushyqudyqtan arnaıy kelgen Orynjan Ábdijaparov quran baǵyshtady.
Uıymdastyrý alqasy ardagerlerdi salalyq «Balyqshy» medalimen marapattady. Merekelik konserttiń aldynda qoı kóterý, gir kóterý, qazaq kúresi, arqan tartý sııaqty sporttyq oıyndar uıymdastyrylǵan bolatyn. Mereke sońynda qonaqtarǵa arnaıy as berildi. Osy arada aıta ketetin jaǵdaı, is-sharany ótkizýge jumsalǵan qarjyny joǵaryda atalǵan qoǵamdyq uıymnyń músheleri jınady.
Qalpen ESETOV,
Túpqaraǵan aýdanynyń qurmetti azamaty
Mańǵystaý oblysy