QR Indýstrııa jáne ınfraqurylymdyq damý mınıstrligi Indýstrııalyq damý komıteti tóraǵasynyń orynbasary Turar Jolmaǵambetov shetelge eksporttalatyn qara metall synyǵynyń kólemi azaıǵanyn aıtty, dep habarlaıdy Egemen.kz.
Ortalyq kommýnıkasııalar qyzmetinde ótken baspasóz máslıhatynda Turar Jolmaǵambetov elimizden qansha tonna qara jáne tústi metall synyǵy men qaldyqtary tasymaldanǵanyn aıtty.
«Qatelespesem, 2000-shy jyldardaǵy esep boıynsha jylyna 3 mln tonnaǵa jýyq qara metall synyǵy elden shyǵarylatyn. Ol jyldary bizde eń basty tutynýshy «ArselorMıttal Temirtaý» AQ bolatyn. 2008 jyldan beri biraz kásiporyn paıda bolyp, metall synyqtary men qaldyqtary ishki naryqta qaıta óńdele bastady. Sońǵy jyldary bizden 1 mln tonnaǵa jýyq metall qaldyqtary shyǵaryldy. Al qalǵan 1,5-1,8 mln tonnasy óz elimizde óńdelip jatyr», dep túsindirdi vedomstvo ókili.