«Nur Otan» partııasy janyndaǵy «Mıras» qoǵamdyq keńesiniń memlekettik tildi oqytýdyń jaı-kúıine, qazaq tilindegi oqýlyqtar men oqý-ádistemelik materıaldardyń sapasyna keńeıtilgen otyrys arnaýy – halyqtyq partııanyń el rýhanııatynyń ózekti máselelerine udaıy kóńil bólýiniń bir kórinisi. Keshe Parlament Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaevtyń jetekshiligimen ótken otyrysta basty nazar oqýlyqtardyń jaı-kúıine aýdaryldy. Otyrysqa keńes múshelerimen qatar osy iske tikeleı qatysty mınıstrlikter basshylary, oqýlyqtar daıyndaýmen, shyǵarýmen aınalysatyn ǵalymdar, baspa dırektorlary shaqyryldy.
Bilim jáne ǵylym mınıstri Aslan Sárinjipovtiń baıandamasynda salada osy baǵytta atqarylyp jatqan jumys áńgimelenip, sheshýin kútken máselelerdiń túıinin tabý joldary sóz etildi. Mádenıet mınıstri Arystanbek Muhamedıulynyń sózinde daıyndalǵan oqýlyqtardyń sapaly jaryq kórýiniń máseleleri qozǵaldy.
Qoǵamdyq keńes osydan biraz ýaqyt burynǵy otyrysynda qazaq tilindegi oqýlyqtardy saraptaý jóninde jumys tobyn quryp, oǵan Qazaq memlekettik qyzdar pedagogıkalyq ýnıversıtetiniń rektory Dınar Nóketaevany jetekshi etip belgilegen edi. Dınar Júsipáliqyzy partııalyq tapsyrmaǵa barynsha jaýaptylyqpen qaraǵanyn kórsetti. Onyń baıandamasynda oqý ádebıetterine saraptama júrgizý nátıjesi naqty aıtylyp, jetistikter men kemistikter tereń taldandy. Bul jumysqa 51 oqytýshy tartylyp, 173 oqý ádebıetine saraptama júrgizilgen eken. Olardyń 56-sy bastaýysh synyp oqýlyqtary, 78-i orta býyn oqýlyqtary, 39-y joǵary synyp oqýlyqtary. Tekserý barysynda keıbir oqýlyqtardyń tıptik oqý baǵdarlamasyna sáıkessizdigi, taqyryptarda aýytqýlardyń kezdesýi, oqý baǵdarlamasyn tolyq qamtymaýy sııaqty qaǵıdatty kemshilikter anyqtalǵan. Bilim alýshylardyń daıyndyq deńgeıi men jas erekshelikteriniń eskerilmeýi, túsinikter men termınderdi engizý ádistemesindegi olqylyqtardyń oryn alýy, oqýshylardyń shyǵarmashylyq belsendiligin jáne ıntellektýaldy áleýetin, logıkalyq oılaýyn damytýdy qamtamasyz etetin materıaldardyń jetildirilmeýi sııaqty jaılar naqty mysaldarmen dáıekteldi.
Ult rýhanııatyndaǵy tuǵyrly tulǵalardyń biri Myrzataı Joldasbekovtiń sózimen aıtqanda, «til taǵdyry úshin torǵaıdaı shyryldap sóılegen» qoǵam qaıratkeri Bekbolat Tileýhannyń baıandamasy emosııalyq jaǵynan qýatty, maǵynalyq jaǵynan salmaqty shyqty. Parlament Májilisiniń depýtaty Aldan Smaıyldyń baıandamasy qatpary qalyń máseleni tereń qozǵaýymen erekshelendi. «Tildaýa» qoǵamdyq qorynyń quryltaıshysy, ádisker muǵalim Tóleý Aımaǵanbetovanyń, Májilis depýtaty, Prezıdent janyndaǵy Adam quqyqtary jónindegi komıssııanyń tóraǵasy Qýanysh Sultanovtyń, «Habar» agenttigi aksıonerlik qoǵamynyń prodıýseri Merýert Qumarovanyń, Qazaq Ulttyq pedagogıkalyq ýnıversıtetiniń professory, deńgeılik oqý ádebıetteriniń avtory Faýzııa Orazbaevanyń, Qazaq Ulttyq pedagogıkalyq ýnıversıtetiniń Oqytýdyń mazmuny men ádistemesi ınstıtýtynyń dırektory Alma Ábilqasymovanyń, Sh.Aımanov atyndaǵy «Qazaqfılm» aksıonerlik qoǵamynyń prezıdenti Ermek Amanshaevtyń, «Oqýlyq» respýblıkalyq ǵylymı-praktıkalyq ortalyǵynyń dırektory Beıbitkúl Kárimovanyń, Baılanys jáne aqparat agenttigi tóraǵasynyń orynbasary Altaı Ábıbýllaevtyń, Qazaqstan Respýblıkasy Ortalyq memlekettik murajaıynyń dırektory Nursan Álimbaıdyń sózderinde barshany tolǵandyrar taqyryp ár qyrynan, belsendilikpen, jaýapkershilikpen, biliktilikpen taldandy.
Otyrysty qorytqan sózinde «Mıras» qoǵamdyq keńesiniń tóraǵasy Máýlen Áshimbaev ortaǵa salynǵan pikir-usynystardyń bári jınaqtalyp, tıisti mınıstrlikke joldanatynyn, belgili bir ýaqyttan keıin bul baǵytta atqarylǵan jumys jóninde naqty aqparat talap etiletinin aıtty.
«Mırastyń» shamamen maýsym aıynda ótetin kelesi otyrysynda Mádenı saıasattyń uzaq merzimdi tujyrymdamasynyń jobasyn talqylaý kózdelip otyr. Mundaı tujyrymdamany ázirleý qajettigin el Prezıdenti Nursultan Nazarbaev «Qazaqstan joly – 2050: bir maqsat, bir múdde, bir bolashaq» atty Joldaýynda kórsetken bolatyn.
Súleımen MÁMET,
«Egemen Qazaqstan».