Qoǵamdyq baqylaý: Jergilikti bıýrokratııa aldynda álsizbiz

Osy maqsatta qurylǵan «El namysy» arnaıy monıtorıng tobynyń tóraǵasy Rafael Gasanov jáne top músheleri atqarylǵan jumystardy jarııalady. Qoǵam belsendileri birqatar keleńsiz jaǵdaıdy anyqtaǵanymen, resmı organ­dardyń ony sheshýge qulyqsyz ekenin alǵa tartty.

Jıyn barysynda R.Ga­sanov alty aıda atqa­ryl­ǵan jumystarǵa toqtaldy. Aldymen ol qoǵamdyq ba­qylaýdyń mańyzdylyǵyn atap ótti. «Memleket basshysy Joldaýda memlekettik or­gandardyń jáne kvazı­mem­lekettik sektordyń halyq aldynda ashyq bolýyn qamtamasyz etetin qoǵamdyq baqylaý qajet ekenin aı­ryqsha atap ótti. Q.Toqaev qo­ǵamdyq baqylaý týraly zań qabyldaý qajet ekenin aıt­qan edi. Búginde zań jobasy ázirlengenimen áli naqty sheshim qabyldanǵan joq», dedi R.Gasanov. Sonymen qatar bar­lyq deńgeıdegi ákimderdiń ju­mysyn atap ótken ol óńir­ler men kishi qalalar bas­shy­larynyń halyqpen baılanysy búginde durys jolǵa qoıylyp kele jatqanyn, alaıda shalǵaı aýyl-aımaq ákimderiniń áli de kabınetten shyqpaı jumys isteý ádisin ustanyp otyrǵanyn jetkizdi.

Monıtorıng tobynyń múshesi Dıdar Smaǵulov bolsa «Ádildik joly» res­pýb­­lıkalyq qoǵamdyq bir­les­­tiginiń memlekettik tap­sy­rystardyń oryndal­ýyn baqylaıtynyn aıtty. Má­selen, birlestik mem­le­ket­tik qyzmetshilerdiń jeke kásipkerlik ashyp, mem­leket­tik tapsyrys boıynsha bel­gili qyzmet kórsetýge qar­jy alyp otyrǵanyn anyq­ta­ǵan. «Ádildik joly» mektep qu­rylysyna bólingen qar­j­ynyń qoldy bolǵanyn anyqtady. Sonyń saldarynan josparlanǵan bilim ordasy salynbaǵan nemese sapasyz boı kótergen. Mundaı jaǵdaılar elimizdiń kóptegen oblysynda bolǵan. Sondaı-aq muǵalimderden zańsyz aqsha talap etken birqatar mektep dırektorynyń zańsyz is-áreketteri áshkerelendi. Búginde qoǵamdyq baqylaý­dyń uıytqy bolýymen zańǵa qaıshy áreketterge qarsy 12 qyl­mystyq is qozǵaldy», dep málimdedi ol.

«El Prezıdenti memle­ket­tik basqarý júıesindegi qoǵamdyq róldiń erekshe rólin aıqyndap berdi. Sonymen qatar biz ózimizdiń qarjylyq táýelsizdigimizdi saqtap qaldyq – memlekettik áleýmettik tapsyrystardy nemese granttardy taǵaıyndaýlarǵa qatyspaı, qarajatty jeke uıymdardan alyp otyrǵanymyz bizge barynsha obektıvti bolýǵa múmkindik beredi. Kez kelgen baǵyt boıynsha seriktester tańdaýǵa múmkindigimiz bar. Prezıdent Joldaýynda qo­ǵamdyq uıymdardyń eldiń tu­raqty jáne jan-jaqty ilgeri­leýiniń mańyzdy faktory ekenin atap ótti, sondaı-aq reformalardy daıyndaý men iske asyrýǵa qoǵamdyq uıymdar men belsendilerdi jan-jaqty jumyldyrýdy tapsyrdy. «El namysy» arnaıy monıtorıng tobynyń qurylǵany, jumys isteýi Prezıdenttiń tikeleı tapsyrmasy deýge bolady. Mundaı toptardyń kóp bolýy jáne belsendiligi Prezıdenttiń tapsyrmalaryn oryndaýdyń belgisi», dedi D.Smaǵulov.

Monıtorıng tobynyń taǵy bir múshesi Áset Ássan­dı Shymkent qalasy men Túrki­stan oblysynyń memle­ket­tik organdary men kvazı­mem­lekettik sektordyń qyz­metine baqylaý júrgizýge qatysady. Bul óńirlerdegi qoǵamdyq baqylaý tobynda 60 adam bar. Onyń aıtýynsha Memleket basshysynyń bıýrokratııadan arylý qajet degen tapsyrmasy óńirlerde áli de júzege asyryla qoımaǵan. «Jergilikti bıýrokratııa aldynda biz álsizbiz» dedi ol.

Qazirgi tańda el boıynsha qoǵamdyq baqylaý to­by­nyń quramynda myńǵa jýyq erikti bar. Olar ár salada memlekettik organdardyń qoǵam aldynda ashyq bolýyn qamtamasyz etýge yqpalyn tıgizip keledi. «Árıne, bizdi bar­­lyq ákimder qushaq jaıa qar­­sy alyp jat­qan joq, qıyn­­dyqtarǵa qara­mastan ju­my­sy­myzdy jalǵas­tyra­myz», deıdi qoǵamdyq baqylaý músheleri.