10 mamyr kúni saǵat 5.00-de Oraldaǵy túrmede jazasyn óteýshiler tóbelesip, 10 adam jaraqat aldy, dep habarlaıdy Egemen.kz BQO boıynsha qylmystyq-atqarý júıesi departamenti baspasóz qyzmetine silteme jasap.
Oqıǵa RÝ-170/2 mekemesinde bolǵan.
Mekeme jataqhanasynda jazasyn óteýshiler bir-birimen sózge kelip, sońy buzaqylyq áreketke ulasqan. 10 mınýt ishinde kezekshi jasaqtyń kúshimen tóbeles toqtatylǵan. Barlyq qatysýshylarǵa alǵashqy medısınalyq járdem kórsetilip, oblystyq kópbeıindi aýrýhanaǵa jetkizilgen. Jazasyn óteýshilerdiń ómirine qaýip joq.
«Atalǵan derek boıynsha Oral qalasy Polısııa basqarmasy Zachagan polısııa bólimi qyzmetkerlerimen QR QK 107-baby 2-bóligine (densaýlyqqa qasaqana aýyrlyǵy ortasha zııan keltirý) sáıkes sotqa deıingi tergeý amaldary júrgizilýde. Kúni búgin jazasyn óteýshiler tarapynan aryz-shaǵym túsken joq. Qyzmettik tekserý taǵaıyndaldy», dep habarlady vedomstvodan.
BQO Polısııa departamenti baspasóz qyzmetiniń aqparatynsha, oqıǵa saldarynan jaraqat alǵan 1985 jylǵy jazasyn óteýshi dáriger qaraǵannan keıin oblystyq aýrýhananyń jansaqtaý bólimine jatqyzylǵan. 1992 jáne 1988 jylǵy jazasyn óteýshiler dárigerler qaraǵannan keıin keri qaıtarylǵan. Oqıǵa ornynan uzyndyǵy 1 metr 6 dana metall turba, uzyndyǵy 1 metr 3 dana aǵash taıaq, qara-qońyr daqtar alynǵan.
BQO Densaýlyq saqtaý basqarmasynyń naqtylaýynsha, barlyǵy 10 adam jaraqat alǵan. Olardyń ekeýi medısınalyq kómekten bas tartty. Jeteýi qalalyq kópbeıindi aýrýhanaǵa jetkizildi. Kómek kórsetilgennen keıin otyrǵan jerlerine qaıtaryldy. Tómengi jaq súıegi synǵan bir adam oblystyq aýrýhanaǵa jatqyzyldy.