Keshe Túrkııada áıelder arasynda ótip jatqan álem chempıonatynyń chempıondyq ataǵyna talasatyn boksshylar tolyqtaı anyqtaldy. Jartylaı fınaldyq saıystyń kúndizgi baǵdarlamasynda tórt sportshymyz sharshy alańǵa shyǵyp, solardyń bireýi ǵana óz jekpe-jegin jeńispen aıaqtady. Ol – Alýa Balqybekova. Al osy mejede súringen Jaına Shekerbekova, Karına Ibragımova jáne Valentına Halzova qola medaldy qanaǵat tutty.
Asa jeńil salmaqtaǵy Azııa chempıony Alýa Balqybekova 2018 jylǵy Eýropa birinshiliginiń kúmis júldegeri, bolgarııalyq Sevda Asenovamen kúsh synasty. 37 jastaǵy ardager boksshy jalyndy jastyń qarqynyna shydaı almady. Báseke bastalǵan bette tizgindi myqtap qolyna alǵan Balqybekova aýyr soqqylaryn kóptep darytty. Birinshi raýndtyń sońǵy mınýtynda Aksenovany qatty uryp, qabyrǵasyn qaıystyryp jiberdi. Nokaýt! Fınalda Alýa túrkııalyq Aıse Chagıryrmen qolǵap túıistiredi.
52 kılo salmaqtaǵy Jaına Shekerbekova Djýtamas Djıtpongpen kezdesti. Álem chempıonatynyń eki dúrkin júldegeri, Azııa chempıony jáne Azııa oıyndarynyń qola júldegeri degen ataǵy bar saqa sportshymyz qansha talpynǵanymen, ózinen segiz jas kishi taılandtyq bylǵary qolǵap sheberinen aılasyn asyra almady. Djıtpong óziniń boıy men qolynyń uzyndyǵyn utymdy paıdalanyp, alǵashqy eki raýndty óz paıdasyna sheshti. Sheshýshi kezeńde bizdiń boksshy basym kóringenimen, jeńis Taı eli ókiliniń ýysynda ketti.
57 kılo salmaqtaǵy Karına Ibragımova óte azýly boksshymen judyryqtasty. Taıpeılik Lın Iý-Tın Olımpıadadan basqa jarystardyń barlyǵynda jeńis tuǵyryna kóterildi. Atap aıtsaq, 2017-2019 jyldary ol álem jáne Azııa chempıony, Azııa oıyndary men álem birinshiliginiń qola júldegeri atandy. Karına ataǵy alysqa jaıylǵan qarsylasymen aıanbaı aıqasty. Biraq myqtynyń aty myqty ǵoı. Qarymta shabýylǵa júgingen Lın kózdegen maqsatyna qol jetkizdi.
70 kılo salmaqtaǵy Valentına Halzova Mozambık ókili Alsında Helena Pangýanmen kezdesýdi qarqyndy bastady. Birinshi raýndta tórt tóreshi jerlesimiz jeńdi dep eseptedi. Úzilisten keıin tarazy basy teńesti. Al sońǵy raýndta qara qurlyqtyń ókili tegeýrinin kúrt kúsheıtti. Valentına jıi qatelesti. Bir mezette Halzova qulap qaldy. Rıngtegi qazy nokdaýn belgiledi. Odan keıin de ekpindep shabýyldaǵan Pangýa jeńisti qazaqstandyq boksshynyń ýysynan julyp áketti.
Al keshki baǵdarlamada 54 kılo salmaqtaǵy Dına Jolaman rýmynııalyq Lakramıoara Perıshochpen kúsh synasty. Bul básekeniń qalaı aıaqtalǵany jaıynda erteń tolyq aqparat beremiz.