Taza tabıǵat – adam ómiriniń kepili deımiz. Keıingi ýaqytta qorshaǵan ortany lastamaý, qorǵaý týraly ekologııalyq máseleler álemde jıi aıtylyp júr. Al aınalany taza ustaý ár adamnyń jeke jaýapkershiliginen bólek ekologııalyq saýattylyǵyna da baılanysty. Osy oraıda Aqtaý qalasynda joǵary synyp oqýshylary men stýdentterge arnalǵan EcoVision ekologııalyq jobasy bastaldy.
Is-shara ekologııalyq máseleler, kómirtegi beıtaraptyǵy hám ekologııalyq bastamalarǵa baılanysty halyqtyń habardar bolý deńgeıin arttyrý maqsatynda uıymdastyrylyp otyr.
Birneshe kezeńnen turatyn joba barysynda oqýshylar men stýdentter iriktelip, onlaın jáne oflaın formattaǵy trenıngter, sheberlik synyptary, praktıkýmdarǵa qatysady. Trenıngterdi ekologııa jáne qorshaǵan ortany qorǵaý taqyrybyna mamandanǵan tájirıbeli sarapshylar, volonterler, jattyqtyrýshylar júrgizedi. Aıta keteıik, atalǵan bastamany «Shell Qazaqstan» kompanııasy jáne Azamattyq bastamalardy qoldaý ortalyǵynyń EcoBatys bastamasy sheńberinde QazaqGeography respýblıkalyq qoǵamdyq birlestigi iske asyryp otyr.
«Bul joba arqyly jastar arasynda ekologııalyq oılaýdy, ekologııaǵa qatysty belsendi azamattyq ustanymdy qalyptastyrǵymyz keledi. Bizdiń maqsatymyz – bolashaqta jergilikti jáne jahandyq ekologııalyq kún tártibine áser ete alatyn eko-kóshbasshylardy tárbıeleý», deıdi joba jetekshisi, «QazaqGeography» RQB ókili Madına Qınaıatova.
Joba jetekshisiniń aıtýynsha, eldegi ekologııany jaqsartý jumysyn eko-oılaýdy damytýdan bastaý kerek.
«Byltyr Qazaqstan 2060 jylǵa qaraı kómirtegi beıtaraptyǵyna qol jetkizý týraly Doktrınany qabyldady. Kómirtektiń beıtaraptyǵy degenimiz ne? Bul ónerkásiptik kásiporyndar kómirqyshqyl gazy shyǵaryndylaryn kómirtegi teris jobalardy júzege asyrý arqyly óteýi kerek degendi bildiredi. Alaıda búkilálemdik antıkómirtekti naýqandaǵy eń mańyzdy nárse – ekologııanyń negizgi uǵymdary prızmasy arqyly jańasha oılaýdy úırený», dedi ol.
Jobaǵa qatysý úshin úmitkerler oblys turǵyndarynyń naqty máselelerin ashyp kórsetip, sondaı-aq olarmen kúresý joldary usynylatyn «Meniń aımaǵymnyń ekologııalyq problemalary» atty esse jazyp jiberýi qajet. «Eko-Hakaton» is-sharasy aıasynda qatysýshylar aımaqtyń, bolashaqta búkil eldiń ekologııalyq kún tártibine áser ete alatyn eko-ıdeıalaryn usyna alady.
Uıymdastyrýshylar EcoVision pılottyq joba ekenin, bolashaqta ony Qazaqstannyń basqa aımaqtaryna da taratýǵa bolatynyn atap ótti.