Naýyrzym óńirinde Balalar jylyna arnalǵan «Sóz qudireti» oblystyq baıqaýy qorytyndylandy. Kórkem prozadan alynǵan úzindini mánerlep oqý boıynsha ótken óner saıysyna 12-13 jas aralyǵyndaǵy balalar qatysty.
Atalǵan kórkemsóz saıysyn Qostanaı oblysy ákimdiginiń mádenıet basqarmasy men Y.Altynsarın atyndaǵy oblystyq balalar men jasóspirimder kitaphanasy uıymdastyryp otyr.
– «Sóz qudireti» baıqaýy toǵyz jyl boıy talantty jastardyń talabyn qoldap, shyǵarmashylyǵyn ushtaýǵa yqpal etip keledi. Bul áýelde ádebıetsúıer kitaphanashylardyń bastamasymen qolǵa alynǵan baıqaý edi. Balanyń sóıleý máneriniń aıqyndyǵyn, oqylymnyń emosıonaldyq kórkemdigin, mátinniń beınelik jelisi men mazmundyq qurylymyn tereń sezinýin jáne akterlik sheberligin shyńdaıtyn dástúrli baıqaýǵa aınaldy, – deıdi Naýyrzym aýdandyq kitaphanasynyń qyzmetkerleri.
Baıqaýǵa mánerlep oqýdan qalalyq jáne aýdandyq deńgeıde ótken saıystardyń jeńimpazdary qatysyp, ázerbaıjan, armıan, belorýs, qyrǵyz, moldavan, orys, tájik, ózbek jáne qazaq avtorlarynyń prozalyq shyǵarmalarynan úzindiler oqydy.
Qazylar alqasynyń sheshimimen Naýyrzym aýdandyq balalar kitaphanasynyń atynan shyqqan Jambyl jalpy bilim berý mektebiniń 8-synyp oqýshysy Tóleýbek Aıajan moldovan qalamgeri S.Vangelıdiń «Gýgýse oqıǵalary» jınaǵyna engen «Etikshi» áńgimesin mánerlep oqyp, baıqaýdyń bas júldesin jeńip aldy.
Qostanaı oblysy