Jyl saıyn 30 mamyrda álemde Dúnıejúzilik allergııa jáne demikpemen kúresý kúni atalyp ótiledi, dep habarlaıdy Egemen.kz
Onyń negizgi mindeti – dárigerlerdiń, naýqastardyń jáne halyqtyń osy aýrýlar týraly aqparattandyrylýyn arttyrý, allergııa men demikpege baılanysty máselelerdi sheshýge qoǵamnyń nazaryn aýdarý jáne pasıentterge kórsetiletin medısınalyq kómektiń sapasyn arttyrý.
Allergııa men demikpe dúnıe júzinde eń keń taralǵan aýrýlardyń biri. Bronh demikpesi tynys alý joldarynyń aýrýlaryna ákeletindigi belgili. Alaıda demikpeniń sebebi allergııa da bolýy múmkin. Búgin biz bronh demikpesi týraly aıtpaqpyz.
Statıstıka boıynsha eresek turǵyndardyń 5%-dan astamy jáne balalardyń 10%-y osy aýrýǵa shaldyqqan. Bronh demikpesi – ártúrli ishki jáne syrtqy qorshaǵan orta faktorlarynyń bronhylardyń tarylýyna yqpal etetin tynys alý joldarynyń aýyr sozylmaly qabyný aýrýy. Bronh demikpesine tán sımptomdar: entigý, jótel, keýdede syryl men aýyrlyq seziminiń bolýy. Bronhylardyń qatty tarylǵan jaǵdaıynda tunshyǵý ustamasy paıda bolady.
- Aldyn alý sharalary ýaqtyly jáne durys josparlanǵan jaǵdaıda demikpeni boldyrmaýǵa bolady. Demikpeniń aldyn alýdyń negizgi baǵyty – allergııa men tynys alý joldarynyń sozylmaly aýrýlarynyń aldyn alý bolyp tabylady. Temeki tútini nemese titirkendirgish hımııalyq zattarmen baılanysta bolatyn balalar allergııaǵa jıi shaldyǵady jáne bronh demikpesimen jıi aýyrady. Eń keń taralǵan allergender: úıdegi shań, taraqandar, kishkentaı keneler, úı janýarlarynyń júni, zeń, tamaqtyń keı túrleri, ósimdik tozańy, - deıdi Kardıologııa jáne ishki aýrýlar ǴZI Respýblıkalyq allergologııalyq ortalyǵy basshysynyń m.a., allergolog ımmýnolog dáriger Araı Batyrbaeva.
Araı Janatqyzyyń aıtýynsha, bronh demikpesin aldyn alý boıynsha durys josparlanǵan jáne júzege asyrylyp jatqan sharalar bul aýrýdyń aldyn alý jáne emdeýdiń tıimdi tásili.
Zamanaýı medısınalyq tájirıbe demikpeniń aldyn alý is-sharalaryn durys oryndaý kóbine aýrýdy emdeýge nemese pasıenttiń demikpege qarsy dári-dármekterdi paıdalanýyn azaıtýǵa jetkilikti ekendigin kórsetti. Dıagnostıkalaý men emdeýdiń zamanaýı ádisteriniń arqasynda aýrýdy baqylaýǵa bolady.
Durys emdeý júrgizgen jaǵdaıda demikpemen aýyratyndardyń kóbi demikpeni baqylap otyrýǵa, onyń sımptomdarynan arylýǵa, ustamalardyń sırek bolýyna nemese tipti olardyń múldem bolmaýyna, arnaıy dári-dármekterdi sırek paıdalanýǵa qol jetkizýine bolady. Osylardyń barlyǵy tolyqqandy ómir súrýge jáne sımptomdar men asqynýlardy umytýǵa múmkindik beredi.
Arýjan Amangeldi