Astanadaǵy Beıbitshilik jáne kelisim saraıynda Prezıdent Nursultan Nazarbaevtyń qatysýymen Qazaqstan halqy Assambleıasynyń HHI sessııasy «Qazaqstan-2050: beıbitshilik, rýhanııat jáne kelisim mádenıeti» taqyrybymen ashyldy. Bul týraly QazAqparat tilshisi habarlady.
Onyń jumysyna QHA músheleri, Parlament depýtattary, Úkimet músheleri, saıası partııalar, dinı konfessııalar, dıplomatııalyq mıssııa basshylary, zııaly qaýym men buqaralyq aqparat quraldarynyń ókilderi jáne shetelden kelgen qonaqtar qatysýda.
Sessııa barysynda Memleket basshysy Sochıde ótken XXII qysqy Olımpıada oıyndarynyń qola júldegeri D.Tenge «Qurmet» ordenin jáne Assambleıanyń birqatar múshelerine «Qazaqstan halqy Assambleıasynyń qoǵamdyq «Birlik» altyn medalin» tabys etedi.
Biz kelisim mádenıetin dástúr retinde urpaqqa mura etýge tıispiz. Bul týraly búgin elordadaǵy Beıbitshilik jáne kelisim saraıynda Qazaqstan halqy Assambleıasynyń «Qazaqstan-2050: beıbitshilik, rýhanııat jáne kelisim mádenıeti» atty kún tártibimen ótip jatqan HHI sessııasynda Prezıdent Nursultan Nazarbaev aıtty.
«Qymbatty otandastar, qadirli qaýym! Qazaqstan halqy Assambleıasynyń XXI sessııasynyń ashylýymen barshańyzdy shyn júregimmen quttyqtaımyn. Uly Jambyl aqynnyń «Jigerli bolsa er bolar, birlikti bolsa el bolar» degen sóz bar. Búgingi sessııanyń ózegi beıbitshilik, rýhanııat jáne kelisim mádenıeti bizdiń osyndaı birlikti el bolmysymyzdyń kepili. Mádenıet tirshiliktiń tiregi. Ortaq ıgiliktiń ulyqtalyp uly isterge uıymdastyrýdyń biregeı tetigi. Beıbitshilik, rýhanııat pen kelisim báriniń tamyry mádenıette», - dedi N.Nazarbaev.
Memleket basshysynyń paıymynsha, XXI ǵasyrdyń eń basty zańy tatýlyq. Tatýlyq penen tynyshtyq arqyly ekonomıka ósip, halyqtyń ál-aýqaty kúsheıedi, beıbitshilik ornaıdy.
«Kelisim - ekonomıka men saıasattyń qaýipsizdigindegi ómirdiń zańy. Biz kelisim mádenıetin dástúr retinde urpaqqa mura etýge tıispiz. Kelisim mádenıeti máńgilik bolýy kerek», - dedi Elbasy.
Sondaı-aq, sessııa qorytyndysynda jıynǵa qatysýshylardyń Qazaqstan halqyna úndeýi qabyldanady dep kútilýde.
Sáken Maılybaı.
Derekkóz: QazAqparat.
Foto: www.kz.all.biz.