SAPA BIIGINE KО́TERILÝ EL USTANYMYNA AINALÝY TIIS

Keshe “Nur Otan” HDP Ortalyq apparatynda 2011-2020 jyldarǵa arnalǵan Qazaqstan Respýblıkasynda bilimdi damytýdyń memlekettik baǵdarlamasy jobasyna arnalǵan dóńgelek ústel ótti. Oǵan bılik partııasy Tóraǵasynyń birinshi orynbasary Nurlan Nyǵmatýlın, bilim berý mekemeleri men memlekettik organdar ókilderi, sarapshylar men ǵalymdar qatysty. Otyrys barysynda atalǵan baǵdarlama jobasy qyzý talqylandy. Dóńgelek ústelde bilim sala­sy­nyń “qazanynda” jatqan san qyrly másele kún tártibine qoıyldy. Olar: orta, kásibı jáne joǵary bilim berý sala­la­ryndaǵy basqarý jáne qarjy­lan­dyrý júıesin jandandyrý, mektepke deıingi tárbıe men oqy­tý júıesin damytý, 12 jyl­dyq bilim berý, bilim berý sapa­syn óńirlik turǵydan teńestirý. Nurlan Nyǵmatýlın “Bilim berý júıesin damytý – Memleket basshysynyń, partııa Tóraǵasynyń únemi nazarynda turady. Sebebi, óz isine sheber na­ǵyz kásibı mamandardy daıar­laý­dyń ulttyq júıesi bolmaı, adam kapıtalynyń sapasyn kótermeı, ekonomıkada belgili bir jetistikke qol jetkizý ekitalaı”, deı kele partııanyń qoǵam men bılik arasynda oń baılanys ornatý, sol arqyly elde adam kapıtalynyń turaqty damýyna jaǵdaı jasaý baǵyttaryn basshy­lyqqa alǵandyǵyn atap ótti. Jıynǵa qatysýshylardyń sóz aýanyna úńilsek, atalǵan baǵ­dar­la­ma jobasy Qazaqstannyń 2020 jylǵa deıingi strategııalyq damý josparynyń, ındýstrııalyq-ın­no­vasııalyq damý baǵdarlamasynyń basym baǵyttarymen ózektes. Bul rette elimizde aıtarlyqtaı utymdy umtylystar baıqalyp keledi. Máselen, qazirgi tańda bilim-ǵylym kókjıegin keńeıtý tóńireginde ıgi sharalar atqarylýda. Jańa bala- baqshalardyń, kásibı lıseıler men kolledjderdiń jáne tuǵyry As­ta­nada ornyǵatyn Jańa ýnıver­sı­tet­tiń boı kóterýi men jumys ja­saýyna memlekettik deńgeıde mán berilgen. Elbasynyń bastamasy negizinde qol­ǵa alynǵan “100 mektep” baǵ­dar­lamasy bilim mekemeleri qury­lysynyń jandanýyna jol ashýda. Búginde atalǵan baǵdarlama sheń­be­rinde 84 mekteptiń negizi qalanyp úlgerdi. 22 mekteptiń qurylysy aıaqtalýǵa shaq qalǵan. Bilim sala­syn­da qajyrly eńbek úlgisin kór­setip júrgen mamandarǵa áleýmettik qoldaý-kómek kórsetý máselesi de nazardan tys qalmaq emes. Dóńgelek ústel basynda bas qosqan azamattar bilim salasynda aýyz toltyryp aıtarlyq is-sharalarmen qatar nazarǵa aıryqsha alatyn jáıtterdiń bar ekendigin de jasyrǵan joq. Solardyń biri – elimizdegi balabaqshalar sanynyń áli de jetispeýshiligi. Bul oraıda, halyqtyń Memleket basshysynyń tikeleı tapsyrmasy negizinde júzege asyrylyp jatqan “Balapan” arnaıy baǵdarlamasynan úmiti mol. Bilim jáne ǵylym mınıstri Janseıit Túımebaev Bilim berýdi damytýdyń 2011-2020 jyldarǵa arnalǵan memlekettik baǵdar­la­ma­synyń tusaýkeser jobasyn usyn­dy. Bul baǵdarlama bilim berý júıesin jańasha jandandyrý, bul salaǵa quıylatyn ınvestısııa kó­lemin ulǵaıtý men turaqtandyrý, bilim sapasyn joǵarylatý jáne onyń eýropalyq deńgeıge kóte­ri­lýine jol ashý syndy mindetterdi kózdeıdi. Láıla EDILQYZY.