Halyqaralyq balalardy qorǵaý kúnine jáne Qazaqstandaǵy Balalar jylyna oraı elordada fýtzaldan Qazaqstan ulttyq quramasynyń oıynshylary bolashaq jas chempıondarmen «Dostyq matchyn» ótkizdi. Mádenıet jáne sport mınıstrliginiń uıytqy bolýymen uıymdastyrylǵan joldastyq oıyn J.Úshkempirov atyndaǵy jekpe-jek sport saraıyna jınalǵan kórermenderge naǵyz merekelik kóńil kúı syılady.
Qazaqstannyń ár óńirinen iriktelgen 2010 jyly týǵan eń úzdik jas sportshylar byltyrǵy álem chempıonatynyń tórtinshi oryn ıegerleri jáne Eýropa chempıonatynyń qola júldegerlerimen terezesi teń oıyn kórsetti. Bas bapker Kakaý bastaǵan, qaqpashy Igıta men alańdaǵy oıynshylar Albert Aqbalyqov, Birjan Orazov, Dáýren Tursaǵulov, Shyńǵys Esenamanov, Edson syndy sańlaqtar qoshtaǵan juldyz fýtzalshylar jas órenderden aılasyn asyra almady. Asa tartysty ótken oıynda 16 gol soǵylyp, match teń eseppen aıaqtaldy.
Oıyn joldastyq kezdesý retinde bolǵanymen, alańda qos tarap bir-birine des bergen joq. Eshkim de aıanyp qalǵysy kelmedi. Igıtanyń alystan tepken dobynan keıin esepti birinshi bolyp ashqan ulttyq qurama oıynshylary birinshi taımda 3:1 esebimen jeńiske jetti.
Ekinshi taımda da oıyn qarqyndy bastalyp, kezdesý ádettegideı alma-kezek shabýylǵa ulasyp jatty. Biraq bolashaq chempıondar da qarap qalǵan joq. 1:5 esebimen jeńilip jatyp, match sońyna deıin tarazy basyn teńestirip ketti. Kezdesýdiń aıaqtalýyna bir mınýt qalǵanda Albert Aqbalyqov tablodaǵy kórsetkishti 8:7-ge jetkizgenimen, ulttyq qurama oıynshylary jeńisti ýysynda saqtaı almady. Sońǵy shabýyldaryn sátti ótkizgen jas órender esepti teńestirip úlgerdi. Qorytyndy esep – 8:8.
Joldastyq kezdesý aıasynda Mádenıet jáne sport vıse-mınıstri Serik Jarasbaev fýtzaldan Eýro-2022 dop dodasynda 7 gol soǵyp, týrnırdiń úzdik surmergeni atanǵan Birjan Orazovqa marapatyn resmı tabystap, QFF fýtzal departamentiniń dırektory Asqar Ábildaevty alǵys hatpen marapattady.
Al oıynǵa qatysqan kishkentaı balalarǵa ulttyq qurama músheleri estelik syılyqtar tabystap, kórermender men jankúıerler fýtzal juldyzdarymen estelik sýretke tústi.