Búgin, 20 sáýir kúni Astana qalasynyń irgesindegi «Balqaraǵaı» demalys ortalyǵynda QR Ulttyq sport túrleri qaýymdastyǵynyń uıymdastyrýymen «Naýryz - ult qundylyqtarynyń bastaýy» atty merekelik is-shara boldy. Bul týraly egemen.kz tilshisi habarlady.
Shara aıasynda «Ulttyq at sporty oıyndarynyń teorııalyq jáne metodıkalyq máni» taqyrybynda semınar-keńes te ótkizildi. Onda tarıh ǵylymdarynyń doktory Elemes Álimhan (ál-Farabı at.QazUÝ), Sh.Ýálıhanov atyndaǵy tarıh jáne etnologııa ınstıtýtynyń professory Ahmet Toqtybaı («Ulttyq sport oıyndarynyń shyǵý tarıhy»), «Botaı» qoryǵynyń avtory Vıktor Zaıbert («Arheologııalyq qazbalardaǵy at sportynyń kóne tarıhy»), «Qazaq tulpary» JShS dırektory Nábıdolla Kıkebaev («Ulttyq sportqa qajetti óz tulparlarymyzdyń tuqymyn shyǵarý joldary») baıandama jasady.
Merekede ulttyq sport túrleriniń kórsetilimi men ulttyq ónimderge arnalǵan taqyryptyq kórme uıymdastyryldy. Onda qazaqtyń qolóneri, ulttyq taǵam túrleri, bes qarý, at ábzelderi, saıatshylyq qural-jabdyqtary, zergerlik, turmystyq buıymdar, fotokórme usynyldy.
Shara barysynda jınalǵan jurtshylyq úshin sondaı-aq merekelik konsert qoıylyp, «Aýdaryspaq», «Kókpar», «Teńge ilý», «Jamby atý» sekildi ulttyq sport oıyndar túrleri kórsetildi.
Serikqazy Kákibalanov.
Derekkóz: egemen.kz.
Foto, vıdeo: egemen.kz.