Ortalyq saılaý komıssııasynyń málimetinshe, saǵat 14:00-ge deıin Qostanaı oblysy turǵyndarynyń 62,47%-y daýys bergen. Birqatar saılaý ýchaskelerinde halyqtyń belsendiligi erekshe joǵary ekeni baıqalady, dep habarlaıdy Egemen.kz.
Mysaly, oblys ortalyǵyndaǵy №15-shi ýchaskeniń tizimine tirkelgenderdiń 70 paıyzy osy ýaqytqa deıin tańdaý jasap úlgeripti.
«Tańǵy 6:00-de jumysqa keldik. Alty jarymda bıýlletenderdi alyp, jáshikterge plomba saldyq. Saǵat 7-ge 10 mınýt qalǵanda Ánuran oınaldy. Saǵat týra jetide ýchaskeni ashtyq. Birinshi kelgen daýys berýshilerge, búgin týǵan kúni bolyp jatqan turǵyndarǵa shaǵyn eskertkish syılyqtarymyzdy berip jatyrmyz.
Halyqtyń referendýmǵa degen yqylasy óte jaqsy, kúlip kelip, daýys berip, izgi tilekterin aıtyp ketip jatyr. Bul ýchaskede 1427 adam daýys berý kerek, qazir, mine, tús aýyp barady, bizge tirkelgen turǵyndardyń shamamen 70 paıyzǵa jýyǵy kelip óz tańdaýlaryn bildirip ketti. Bizde daýys beretin eki jáshik bar, bireýi osynda turady. Ekinshisin referendým ýchaskesine kele almaıtyn qarııalardyń, kózi kórmeıtin, arbaǵa tańylyp otyrǵan múmkindigi shekteýli adamdardyń úılerin aralaýǵa shyqqan ókilderimiz ózderimen birge alyp júr. Komıssııa músheleri mundaı 14 adamnyń mekenjaıyna kirip shyǵady. Ol kisilermen bir jeti buryn habarlasyp, kelisip qoıdyq. Jyljymaly jáshik 16:00-ge deıin osynda kelýi tıis», dedi referendým ýchaskesiniń tóraǵasy Erlan Bımaǵambetov.