«Járdem» mamandandyrylǵan medısınalyq poıyzy 13 maýsymnan bastap Atyraý oblysynyń shalǵaıdaǵy stansııalary men olarǵa jaqyn ornalasqan eldi mekenderdiń turǵyndaryn tegin medısınalyq tekserýden ótkizedi, dep habarlaıdy Egemen.kz.
13-14 maýsym Týmannoe, 15-16 maýsym Aqqystaý, 17-18 maýsym Naryn, 19-20 maýsym Isataı, 21-22 maýsym Afanasevo, 23-24 maýsym Ganıýshkıno, 25-26 maýsym Jamansor, 27-28 maýsym Muqyr turǵyndaryn tańǵy 09.00-den bastap keshki 18.00-ge deıin medısınalyq poıyzdyń mamandary qabyldaıdy.
«Shalǵaı aýyldardy aralap, tegin kómek kórsetip júrgen mamandardyń qatarynda terapevt, pedıatr, kardıolog, nevropatolog, oftalmolog, gınekolog, hırýrg, ýrolog, mammolog jáne stomatolog bar. Bıyl bilikti mamandardyń quramy psıholog jáne dermatovenerologpen tolyqty. Sonymen qatar bıyl stamotologııalyq qurylǵylar da jańartyldy. Medısınalyq poıyzda bıohımııalyq taldaýlar, rentgenografııa men flıýrografııa, ishki aǵzalar men tamyrlardyń ÝDZ-zertteýlerin, elektrokardıogramma, gastrofıbroskopııa jáne dıagnostıkalyq zertteýlerdiń basqa da túrlerin júrgizýge múmkindik bar», dedi «Járdem» medısınalyq poıyzynyń bas dárigeri Aınur Eginbaeva.
Esterińizge sala ketsek, «Járdem» poıyzy 23 mamyr kúni Almaty-2 stansııasynan Mańǵystaý oblysyna attandy. Jobanyń basty maqsaty – medısınalyq qyzmetke qoly jetpeıtin shalǵaı aýdandardyń turǵyndaryn sapaly medısınalyq kómekpen qamtamasyz etý.
«Járdem» medısınalyq poıyzy 26 mamyr men 12 maýsym aralyǵynda Mańǵystaý oblysynan shalǵaıda ornalasqan 9 stansııanyń turǵyndaryna úzdik mamandardan tegin dárigerlik keńes usynyp, alǵashqy kómek kórsetti.
Mańǵystaý oblysyndaǵy dárigerlik tekserýlerdiń statıstıkasy kelesideı: dárigerlik tekserýlerdiń sany – 11995. Pasıentterge poıyz mamandary konsýltasııalyq-dıagnostıkalyq qyzmetter kórsetti. Ásirese JPD/terapevt/pedıatr dárigerlerine kóp júgingen, ıaǵnı 2008 naýqas. Odan keıin ýrologqa 1127 naýqas, oftalmologke 1099 naýqas, nevropatologqa 1004 naýqas jáne hırýrg mamanyna 968 naýqas kelgen.
Poıyz dárigerleri barlyǵy 1043 EKG, 1087 ÝDZ jáne 583 flıýorografııa prosedýralaryn ótkizdi. Sonymen qatar 77 shaǵyn hırýrgııalyq ota jasaldy, onyń ishinde: turaqty tisti julý (qarapaıym) – 19, turaqty tisti julý (kúrdeli) – 7, jarany drenajdaý – 51.
Sondaı-aq poıyz mamandary qant dıabeti, artroz jáne artrıt, sozylmaly pıelonefrıt, arterııalyq gıpertenzııa, omyrtqanyń osteohondrozy, sozylmaly pankreatıt jáne sozylmaly holesıstıt, jatyr mıomasy jáne jatyr moıny erozııasy, prostatıt, glaýkoma, sozylmaly bronhıt jáne bronh demikpesi, sondaı-aq týberkýlezge kúdik (flıýro - oń nátıje) aýrýlaryn anyqtady.
«Medısınalyq poıyz dárigerleriniń kómegimen Qaraqııa stansııasynda 4-5 jastaǵy balalarǵa súndetteý júrgizildi. Sondaı-aq №10 razezde qıyn jaǵdaıǵa túsken sábıge kómek kórsetti. Aýyr dárejedegi kúıik dıagnozymen (teri transplantasııasy) túsken bir jarym jastaǵy balaǵa kórsetilgen stasıonarlyq emdeýden keıin poıyz dárigerleri kúrdeli tańý júrgizdi», dep atap ótti Aınur Eginbaeva.
Poıyz dárigerleri alǵashqy medısınalyq-sanıtarlyq jáne konsýltatıvtik-dıagnostıkalyq kómek kórsetedi. Zerthanalyq ádisterdi qoldana otyryp, pasıentterdi tekseredi. Qajet bolǵan jaǵdaıda shaǵyn operasııalardy júrgizedi. Salalyq mamandary bar emhanalary joq shalǵaı aýyldardyń turǵyndaryna josparly emdeýge jatqyzýǵa joldama beredi.
Aýyl turǵyndary pandemııadan keıin tegin ári sapaly medısınalyq kómek kórsetetin poıyzdy úlken úmitpen kútkenderin jasyrmady. Sondaı-aq medısınalyq poıyz dárigerlerine shynaıy alǵystaryn bildirdi.
«Osy «Járdem» poıyzyn densaýlyǵymyzdy teksertý úshin kópten kúttik. Dárigerler bizdi tekserip, nusqaýlyq berip, ózimizge kerek ýkol-dárilerdi jazyp berdi. Mamandar jiti qarap, tekserip jatyr. Pandemııaǵa baılanysty eki-úsh jyldan beri kelmeı qaldy ǵoı. Mańǵystaýdy bilesizder, ekologııalyq aımaq. Sondyqtan jylyna alty aı saıyn eki ret kelse degen tilegim bar. «Járdem» poıyzynyń mamandaryna alǵysymyz sheksiz», dep alǵys bildirdi Jetibaı aýylynyń turǵyny Janar Dáýletbaeva.
Medısınalyq poıyz aldaǵy ýaqytta Aqtóbe, Batys Qazaqstan, Qyzylorda, Túrkistan jáne Jambyl oblystaryna barady.
Jobany «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory QR Densaýlyq saqtaý mınıstrliginiń qoldaýymen, «Qazaqstan Temir Joly» UK AQ janyndaǵy «Áleýmettik jobalar qory» korporatıvtik qorymen birlesip iske asyryp otyr.
2022 jyly eki medısınalyq poıyzdyń baǵyttary jalpy Qazaqstan boıynsha josparlanǵan, bul rette olar shalǵaı aýdandardyń 147 stansııasyn qamtıdy. «Járdem» medısınalyq poıyzy 23 mamyrdan 6 qarashaǵa deıin 80 stansııany, al «Salamatty Qazaqstan» 20 maýsymnan 2 qarashaǵa deıin 67 stansııany aralaıdy.