Qazaqstan Pezıdenti Qasym-Jomart Toqaev Ulttyq quryltaıda sóılegen sózinde qazaq jastaryn adal eńbek arqyly básekege qabiletti Qazaqstandy qurýǵa shaqyrdy, dep habarlaıdy Egemen.kz.
«Álemde eńbekti básekelestik deńgeıine kótergen memleketter bar. Sonyń arqasynda olar sapaly ónimderimen jer júzin moıyndatyp otyr. Bul halyqtar óz urpaǵyn jas kezinen tynbaı jumys isteýge baýlıdy. Solardyń tájirıbesin ózimizge beıimdep, bala tárbıesine engizý jaıyn qarastyrǵan jón. Halqymyz «Eńbek – yrystyń bulaǵy, baqyttyń shyraǵy» dep beker aıtpaǵan. Jańa Qazaqstanda eńbekqor adam eń syıly adam bolýǵa tıis. Biz óskeleń urpaqty adal eńbekke baýlyp, jahandyq naryqta básekege qabiletti etip tárbıeleýimiz qajet. Mańdaı termen tapqan ár tıyn – naǵyz ardyń isi, Abaı aıtqan «tolyq adamnyń» eńbegi ekenin jastardyń sanasyna toqýymyz qajet», dedi Memleket basshysy.
Prezıdent qazirgi zaman - aqyl-oı jáne daryn ıeleriniń zamany ekenin eske salyp, elimiz de osy kóshten qalmaý kerektigin aıtty.
«Qazaq – qoly ashyq, qaıyrymdy, qonaqjaı halyq. Buǵan eshkimniń talasy joq dep oılaımyn. Biraq, álemde osyndaı qasıetterge ıe halyqtar az emes. Jastarymyz, eń aldymen, zııatkerlik qabileti joǵary, oıy ushqyr, eńbekqor bolýy qajet. Qazir – aqyl-oı jáne daryn ıeleriniń zamany. Qazaqstan da osy kóshten shet qalmaýǵa tıis. Ozyq bilim men qajyrly eńbekti ushtastyra bilsek qana elimiz ósip-órkendeıdi. Kózdegen maqsatyna jetedi. Halqymyz qanaǵatshyl, únemshil, ónertapqysh bolýǵa umtylýy kerek. Osyndaı jaqsy qasıetter árkimniń muratyna aınalýǵa tıis», dep túıindedi Qasym-Jomart Toqaev.