16 maýsym kúni Nur-Sultan qalasyndaǵy «Jastar» saraıynda medısına qyzmetkerleri kúnine oraı aqhalatty abzal jandardy saltanatty túrde marapattaý rásimi ótti, dep habarlaıdy Egemen.kz qala ákimdiginiń resmı saıtyna silteme jasap.
Medısına qyzmetkerleri kúnine oraılastyrylǵan is-shara «Altyn júrek» uranymen ótti. «Altyn júrek» ataýy koronavırýs ınfeksııasymen toqtaýsyz kúres kezeńinde aqhalatty mamandardyń kórsetken erligi men eńbegine arnalǵan. Sol sııaqty bul taqyryp eldiń densaýlyǵyn nyǵaıtý úshin moınyndaǵy boryshyn óteý jolyndaǵy abzal jandardyń janashyrlyǵyn, qamqorlyǵyn bildiredi. Sebebi sońǵy 2 jylda medısına qyzmetkerleri COVID-19 ınfeksııasymen aldyńǵy shepte kúresti.
Saltanatty is-sharaǵa qala ákimi Altaı Kólginov, Densaýlyq saqtaý mınıstri Ajar Ǵınııat, Parlament Májilisiniń depýtattary, ulttyq jáne respýblıkalyq uıymdardyń, qala máslıhatynyń ókilderi qatysty.
Qala ákimi Altaı Kólginov elordanyń densaýlyq saqtaý júıesin damytý jáne jaqsartý jolynda árbir mamannyń qosqan úlesine toqtala kele olardyń koronavırýs ınfeksııasymen kúres kezeńindegi jumysyn erekshe atap ótti.
Densaýlyq saqtaý júıesiniń 30-dan astam mamany dıplom men tósbelgilermen marapattaldy, sondaı-aq 8 nomınasııa boıynsha jeńimpazdar anyqtaldy. Olardyń árqaısysyna 1 mln teńgeden aqshalaı sertıfıkat jáne bestdoctor.kz medısınalyq aqparattyq portalynyń lımıttelgen ataýly belgileri tabystaldy.
Otandyq medısına júıesiniń damýyna eleýli úles qosqan aqhalatty mamandar, qoǵam qaıratkerleri «Eńbek ardageri», «QR Densaýlyq saqtaý salasynyń damýyna qosqan úlesi úshin» jáne «QR Densaýlyq saqtaý isiniń úzdigi» medaldarymen marapattaldy.
Sondaı-aq Nur-Sultan qalasy ákiminiń jáne Densaýlyq saqtaý mınıstriniń atynan qurmet gramotalary men alǵys hattar tabys etildi.
Is-shara bastalǵanǵa deıin «Jastar» saraıynyń birinshi jáne ekinshi qabatynda «Men jáne meniń dárigerim» taqyrybynda fotokórme uıymdastyrylyp, onda abzal jandardyń jumys istep júrgen sátteri, balalar dárigerleriniń fotosýretteri jáne balalar stasıonarlarynda emdelip jatqan kishkentaı pasıentterdiń sýretteri kórinis tapty. Sol sııaqty perfomans (óner nysandary) oılap shyǵarylyp, onda medısına qyzmetkerleriniń naýqastardy emdeý barysy kórsetildi.
Saltanatty jıynda medısına qyzmetkerleri marapattalǵan soń kesh baǵdarlamasy boıynsha elorda medısınasynyń táýelsizdik jyldaryndaǵy tarıhy men damýy týraly beınerolık kórsetildi, sonymen qatar COVID-19 pandemııasy kúsheıip turǵan shaqta qaıtys bolǵan dárigerlerdi eske alýǵa arnalǵan fılm qoıylyp, jınalǵan qaýymnyń kózine eriksiz jas keldi.