Vedomstvonyń málimdeýinshe, bul fakt QR QK-niń 296-baby «Esirtki quraldarymen, psıhotroptyq zattarmen, olardyń analogtarymen satý maqsatynsyz zańsyz jumys isteý» boıynsha SDTBT-ǵa engizilip, qylmystyq is qozǵaldy.
«Jedel ýákilder Saıram aýdanyna qarasty respýblıkalyq «Almaty-Tashkent» tas jolynyń boıynda ornalasqan janarmaı quıý beketiniń mańynda kúdikti retinde jaıaý ketip bara jatqan jolaýshyny ustady», dedi Túrkistan oblysynyń PD baspasóz qyzmeti.
Polıseılerdiń habarlaýynsha, kúdiktiniń jeke basyn tintý kezinde qolyndaǵy sómkesiniń ishinen 14 dana polıetılen paketke salynǵan qońyr-jasyl tústi aıryqsha ıisi bar esirtkige uqsas zat tabyldy. Ol óz erkimen ózine tıesili ámııanynan 1 dana paketke salynǵan, sondaı-aq 1 dana qaǵazǵa oralǵan esirtkige uqsas untaq jáne «Tramadol» jazýy bar 5 dana psıhotroptyq dárisin tapsyrdy.
«Zertteý qorytyndysyna sáıkes sómkeden alynǵan zattyń salmaǵy 1 kelige jýyq «gashısh» bolyp shyqty. Al ámııannan alynǵan pakettegi zat 1,5 gramm sıntetıkalyq esirtki, qaǵaz oramadaǵy zat 1 gramm «geroın» ekeni rastaldy», dep qosty PD baspasóz qyzmeti.
Qazir sotqa deıingi tergeý amaldary júrgizilýde.
Aıana Toǵanbek