Búgin elorda kúnine oraı «Qazanat» ıppodromynda «Elorda báıgesi» týrnıri ótti, dep habarlaıdy Egemen.kz.
«Qazaq halqynyń rýhyn kóterip, arqasyn qozdyratyn ulttyq sportymyzdyń biri – báıge bolsa, sol báıgeniń sánin keltiretin, osynaý ulanǵaıyr dalaǵa ıelik etýimizge eresen eńbek sińirgen ulttyq brendimiz – qazaqtyń qazanaty. Elorda kúnine oraı osyndaı alaman báıge uıymdastyryp, merekeniń sánin asyryp jatqanymyzdyń ózi úlken mereı. Barshańyzdy qala kúnimen quttyqtaımyn», dedi Premer-Mınıstrdiń orynbasary Eraly Toǵjanov báıgeniń ashylý saltanatynda.
Elordanyń 24 jyldyq mereıtoıynda ótken respýblıkalyq báıgede Nur-Sultan, Almaty, Shymkent qalalary men elimizdiń barlyq óńirinen 150-den astam sáıgúlik baǵyn synady.
Jarystyń jalpy júlde qory – 20 mıllıon teńge. At jarysy ushqyr báıge (1 400 jáne 2 400 metr), qunan báıge (7 000 jáne 9 000 metr), kishi alaman (16 shaqyrym) jáne alaman báıge (20 jáne 21 shaqyrym) syndy 7 túr boıynsha ótti.
20 shaqyrymdyq alaman báıgede 8 sáıgúlik jarys jolyna shyǵyp, Qostanaı oblysynan kelgen Murat Ismaǵambetovtiń «Rıba» esimdi tulpary máre syzyǵyn alǵash bolyp kesti.