Memlekettik kirister komıteti áleýmettik mańyzy bar azyq-túlik taýarlary men tas kómirdiń ótkizilýin qadaǵalaıdy, dep habarlaıdy Egemen.kz.
Vedomstvo áleýmettik mańyzy bar azyq-túlik taýarlary men tas kómirdi qadaǵalaý boıynsha pılottyq jobanyń qatysýshylaryna arnap jadynama ázirlegen. Bul joba 2022 jylǵy 30 sáýirden bastap jumys isteıdi. Basty maqsaty – azyq-túlik qaýipsizdigin qamtamasyz etý, ınflıasııanyń ósimin boldyrmaý jáne azyq-túlik taýarlaryna baǵanyń negizsiz kóterilýine jol bermeý.
«Joba el aýmaǵynda bıylǵy 31 jeltoqsanǵa deıin jumys isteıdi. Áleýmettik mańyzy bar azyq-túlik taýarlaryn jáne tas kómirdi qadaǵalaý elektrondyq shot-faktýralardyń aqparattyq júıesi negizinde júrgiziledi. Barlyq áleýmettik mańyzy bar azyq-túlik taýarlaryn ótkizýshiler elektrondyq shot-faktýralardyń aqparattyq júıesi esf.gov.kz portalyna tirkelýi tıis. Sonymen qatar aqshalaı esep aıyrysýdy júzege asyrýda, onyń ishinde jeke tulǵalarǵa bólshek saýdada ótkizý kezinde baqylaý-kassa mashınasynyń chegin usyný qajet», dep jazdy komıtetten.
Aıta keteıik, áleýmettik mańyzy bar azyq-túlik taýarlaryna mynalar jatady: aq qant – qumsheker, kúnbaǵys maıy, birinshi sortty bıdaı uny men nany (pishindi), taýyq eti (san súıek jáne irgeles jumsaq eti bar san jiligi), sıyr eti (súıekti jaýyryn-tós bóligi), rojkı (ólshenip salynatyn), maılylyǵy 2,5% jumsaq qaptamadaǵy sút pen aıran, qaraqumyq jarmasy (dán, ólshenip salynatyn), tazartylǵan kúrish (domalaq dándi, ólshenip salynatyn), sary maı (tuzdalmaǵan, maılylyǵy 72,5 %-dan kem emes, toltyrǵyshtar men ósimdik maılary joq), kartop, sábiz, taýyq jumyrtqasy (I sanatty), basty pııaz, as tuzy, aq qaýdandy qyryqqabat, súzbe (maılylyǵy 5-9 %).
«Ákimshilik quqyq buzýshylyq týraly» kodekste salyq tóleýshiniń EShF tólemegeni úshin 40 AEK-ke (122 520 teńge) deıin, merzimin buza otyryp EShF jazyp bergeni úshin 20 AEK-ke (61 260 teńge) deıin jáne baqylaý – kassa mashınasynyń chegin bermegeni úshin shaǵyn kásipkerlik sýbektileri úshin 30 AEK-ke (91 890 teńge) deıin jaýapkershilik kózdelgen.
Aıana Toǵanbek