QR Parlamenti Senatynyń Tóraǵasy Máýlen Áshimbaev Qurban aıt merekesimen quttyqtady, dep habarlaıdy Egemen.kz.
«Barshańyzdy qasıetti Qurban aıt meıramymen shyn júrekten quttyqtaımyn!
Qurban aıt – eldi birlik pen beıbitshilikke shaqyratyn, ózara syılastyq pen qurmetti dáripteıtin, izgi amaldar men qaıyrymdy ister jasaýǵa yntalandyratyn mereke. Jaqsylyqqa jaqyn jáne kópke qamqor bolý – osy meıramnyń mańyzdy sharttary. Bul qundylyqtar eldiń irgesin bekemdeýge jáne rýhanı kelbetin kemeldendirýge eleýli yqpal etedi.
Aıt kezindegi osyndaı ıgilikti ister bizdiń ulttyq bolmysymyzǵa aınalǵany anyq. Olar elimizdegi tatýlyq pen kelisimniń nyǵaıýyna da úlken septigin tıgizýde. Shyn máninde, izgilik pen meıirimdilik qashanda halqymyzdyń yrys-yntymaǵyn arttyra túsedi.
Osy ulyq merekede elimizge amandyq, jerimizge tynyshtyq jáne ár shańyraqqa shattyq tileımin! Shalǵan qurbandyqtaryńyz ben nıetterińiz qabyl bolsyn! Aıttan aıtqa aman-esen jete bereıik!», delingen quttyqtaýda.