Saýaldy bulaı tótesinen qoıýymyzdyń syry bar. Balalardy jazǵy saýyqtyrý kezeńinde óńirde aýyz toltyryp aıtarlyqtaı jumystar atqarylyp jatyr. Soǵan qaramastan, kámelet jasyna tolmaǵan balalar tún qatyp qala kezip, ereje buzyp tártip saqshylarynyń nazaryna iligip júr.
О́ńirde mektep janyndaǵy 390 lager – 31 940, qala syrtyndaǵy saýyqtyrý lageri 7 683 balamen qamtylǵan. 402 demalys alańynda 117 798 oqýshy túrli úıirmelerge qatysady. Bir qaraǵanda, balalardyń barlyǵy da nazardan tys qalmaǵan. Sóıte tura olardyń qaraýsyz kóshe kezýi neni meńzeıdi?
«Túngi qaladaǵy balalar» respýblıkalyq jedel aldyn alý is-sharasy barysynda óńirdegi ishki ister organdaryna táýlik ishinde 172 jasóspirimniń jetkizilgeni oılandyrmaı qoımaıdy. Is-shara barysynda alkogol ónimderin satýdyń 6 deregi anyqtalǵan. Sondaı-aq kámeletke tolmaǵan jasóspirimder túngi ýaqytta daıashy bolyp jumys istegen eki oıyn-saýyq orny belgili bolǵan. Kámeletke tolmaǵandardyń túngi ýaqytta zańdy ókilderiniń erip júrýinsiz oıyn-saýyq mekemelerinde jáne turǵynjaıdan tys jerde bolǵany úshin 167 ata-ana jáne kóńil kóterý oryndarynyń 7 laýazymdy tulǵasy ákimshilik jaýapkershilikke tartylǵan.
«Oblysta mektep bitirý keshterine arnalǵan is-sharalardyń ótkizilip jatqanyn eskeremiz, osyǵan baılanysty barlyq oıyn-saýyq mekemesi, sondaı-aq jastar kóp jınalatyn oryndar erekshe nazarda bolady. Kámeletke tolmaǵandardyń demalýǵa jáne serýendeýge arnalmaǵan oryndary men sý aıdyndary erekshe alańdaýshylyq týǵyzýda. Jyl basynan beri jeke úılerdiń aýmaǵynda jas balalardyń sýǵa batyp ketýiniń 2 deregi tirkeldi. Budan taǵy da ata-analar tarapynan kámeletke tolmaǵan balalarynyń bos ýaqytyn tıimdi paıdalanýda tıisti baqylaýdyń bolmaǵanyn kórip otyrmyz», deıdi oblystyq Polısııa departamentiniń Jergilikti polısııa qyzmeti basqarmasy ıývenaldyq polısııa tobynyń erekshe tapsyrmalar jónindegi aǵa ınspektory, polısııa polkovnıgi Qýanyshbek Qaljanov.
Jambyl oblysy