Úkimettiń keńeıtilgen otyrysynda Memleket basshysy Qasym-Jomart Toqaev qant tapshylyǵyn retteı almaǵan Saýda jáne ıntegrasııa mınıstri Baqyt Sultanov pen Aýyl sharýashylyǵy mınıstri Erbol Qarashókeevke jáne kıikterge baılanysty Ekologııa, geologııa jáne tabıǵı resýrstar mınıstri Serikqalı Brekeshevke sógis jarııalady, dep habarlaıdy Egemen.kz.
«Búginde buryn iske qosylǵan jeti qant zaýytynyń tórteýi ǵana jumys istep tur – Almaty jáne Jambyl oblystarynda. Olardyń ózi tek úshten bir qýatymen ǵana jumys isteıdi. Júktelimi – 31% ǵana. Aýyl sharýashylyǵy mınıstrligi qyzylsha qantynyń úlesin 2026 jylǵa qaraı 6 ese 7%-dan 43%-ǵa deıin kóbeıtýdi josparlap otyr. Alaıda, keıingi tórt jylda qant qyzylshasynyń alqaby úshten birge qysqaryp ketken», dedi Memleket basshysy.
Sondaı-aq ol Qazaqstannyń syrttan keletin qantqa 90% táýeldi ekenin aıtty.
«Bul jerde Eýrazııalyq ekonomıkalyq odaq aıasyndaǵy sheshimderge silteýge bolady. Biraq, bul – báribir Úkimettiń zor kemshiligi, ıaǵnı memlekettiń ustanymyn qorǵaı almady. Sondyqtan, men mınıstrler Baqyt Sultanov pen Erbol Qarashókeevke sógis jarııalaımyn. Úkimetke shuǵyl tártipte qant salasyn damytýdyń jeke salalyq jobasyn ázirleý kerek», dedi Q. Toqaev.
Sonymen qatar Prezıdent kıikterge baılanysty Ekologııa, geologııa jáne tabıǵı resýrstar mınıstri Serikqalı Brekeshevke sógis jarııalady.
«Salalyq mınıstrlikke qatysty aıtsaq, mınıstrge sógis jarııalaımyn. Kıikterdiń keleshek taǵdyry týraly túsiniksiz áýre-sarsań men pikirtalas qalyptastyrǵany úshin sógis jarııalanady. Munyń bárin qoǵamdyq talqylaýdyń osynshalyq deńgeıine shyǵarýdyń qajeti ne? Bul máselege ultymyzdyń mentalıtetin eskere otyryp, kásibı turǵyda kelý kerek. Shynymen de, kıik – qazaq halqy úshin kıeli janýar bolyp esepteledi», dedi Qasym-Jomart Toqaev.
Otyrys barysynda Memleket basshysy 80 myń kıikti atý máselesine qatysty pikir bildirdi.
«Tabıǵı landshaftan 80 myń bas kıikti alyp qoıý, ıaǵnı óltirý týraly usynys engizilip otyr. Biraq, basqa da tásilderi bar shyǵar. Mamandarmen aqyldasyńyzdar. Al bul – eń shetin shara ǵoı. Men bul sharaǵa da júginýimiz múmkin ekenin joqqa shyǵarmaımyn. Biraq, bul – shetin shara, qaıtalap aıtamyn. Bul máselege kásibı turǵyda kelý kerek», dedi Memleket basshysy.