Ulttyq mýzeıde Qazaqstan men Majarstan memleketteri arasyndaǵy dıplomatııalyq qarym-qatynasqa 30 jyl tolýyna oraı, Majarstan óner akademııasynyń múshesi, grafıka sýretshisi, anımator, jazýshy, Koshýt atyndaǵy ulttyq syılyqtyń laýreaty Ishtvan Orostyń «Sýretke salynǵan ýaqyt» atty kórmesi ashyldy.
Saltanatty rásimde mýzeı dırektorynyń mindetin atqarýshy Aıbek Sydyqov eki el arasyndaǵy mádenı baılanystyń mańyzdylyǵyna toqtaldy.
«Árbir eldiń ulttyq tili, salt-dástúri men ádet-ǵurpy bolsa da ónerdiń shekarasy, sheti men shegi joq. Sýretshiler tek ózindik kózqarasy men kez kelgen shabyt týdyrǵan obektisi týraly túrlishe kórip, sezinýi jáne óner arqyly sóılete alýymen ǵana erekshelenedi. Búgin Ulttyq mýzeıde ashylǵan «Sýretke salynǵan ýaqyt» kórmesi túbi bir túrki jurtynan taralǵan qazaq jáne majar ulttarynyń óneraralyq baılanysyn sýretteıd», dedi A.Sydyqov.
О́z kezeginde Majarstannyń Qazaqstan Respýblıkasyndaǵy Tótenshe jáne ókiletti elshisi Otto Ivan Rona alǵysyn bildire otyra, kórmeniń mańyzdylyǵyn atap ótti.
«Qazirgi tańda Qazaqstan men Majarstan arasynda mádenı-gýmanıtarlyq jáne basqa da salalar boıynsha tyǵyz yntymaqtastyq qatynastar turaqty damyp keledi. Búgingi kórme de sonyń jarqyn kórinisi. О́zim ónertanýshy bolmasam da, sýretshi ár detalǵa nazar aýdartý arqyly tutastaı bir beıneni kóz aldyńa elestetedi. Illıýzııaǵa toly týyndylar kórermenderdiń kóńilinen shyǵady degen oıdamyn», dedi Otto Ivan Rona.
Atalǵan kórmede «Jasyrylǵan beıneler», «Aınalar men shaǵylýlary», «Bos» syndy týyndylar toptamasy qoıyldy. Sýretshi shyǵarmashylyǵynda erekshe oryn alatyn dańqty anamorfozalar da kórme qonaqtarynyń nazaryna usynyldy. Bul – abstraktyly týyndylar, olardyń shynaıy maǵynasyn tek qos maǵynaly sýret tóńireginde tikeleı ornatylǵan arnaıy qurylǵylardyń – konýstyq nemese sılındrlik aınalardyń kómegimen tamashalaıdy.
Aıta keteıik, Ishtvan Oros dástúrli sýret salý tehnıkasynda beınelengen vızýaldy paradokstardy jáne keńistiktik elesterdi paıdalana otyryp, kúrdeli optıkalyq ıllıýzııalar jasaıdy. 1984 jyldan bastap sýretshi grek tilinen aýdarǵanda «eshkim» maǵynasyn bildiretin «Ýtıs» (Utisz) laqap atyn qoldanady.
Klassıkalyq beıneleý óneri mektebiniń shákirti bola otyryp, Ishtvan Oros ǵasyrlar boıy qalyptasqan kórkemdik dástúrlerdi, sondaı-aq batyl jańashyl ıdeıalardy biriktiretin, ózindik erekshe, qaıtalanbas stıl jasaǵanyn baıqaımyz.
Is-sharaǵa dıplomatııalyq qoǵamdastyq ókilderi, qoǵam qaıratkerleri men sýretshiler, zııaly qaýym ókilderi qatysty.