Bıyl qazaq ádebıetiniń alyp báıteregi Sherhan Murtazanyń týǵanyna toqsan jyl tolyp otyr. Mereıli dataǵa oraı oblys ákimi Nurjan Nurjigitovtiń qolǵa alýymen qaıratker qalamgerdiń týǵan topyraǵy Jambyl óńirinde atqarylatyn is-sharalar az emes.
Buǵan deıin qalamgerdiń eskertkishi qaı kóshege ornatylatyny el ishinde ábden talqylanǵan bolatyn. Áleýmettik jeli belsendileri de óz usynystaryn jetkizip jatty. Kúni keshe jergilikti qalamgerler men zııaly qaýym ókilderinen quralǵan komıssııa músheleri naqty sheshim shyǵardy. Komıssııa tóraǵasy, «Kóne Taraz» qoǵamdyq qorynyń prezıdenti Muratbek Ázimovtiń aıtýynsha Sheraǵanyń eskertkishi Jambyl dańǵylynyń boıynda boı kóteredi.
«Biraz ýaqyt buryn óńir basshysy Nurjan Nurjigitov Sherhan Murtazanyń toqsan jyldyq torqaly toıyna oraı eńseli eskertkish ornatý kerektigin aıtyp, jaýapty tulǵalarǵa shegelep turyp tapsyrma bergen bolatyn. О́z sózinde oblys ákimi eskertishti qaı kósheniń boıyna ornalastyrý kerektigin halyqpen keńesip sheshý qajettigin aıtty. Keıinnen eskertkishtiń eskızdik úlgisine qatysty baıqaý uıymdastyryldy. Qazaqstannan bólek, О́zbekstan, Qyrǵyz Respýblıkasy elderinen de úmitkerler qatysty. Nátıjesinde, 17 músinniń úlgisi qaraldy. Komıssııa músheleri olardyń ishinen úzdik dep tapqan úsheýin tańdady.
Endi eskertkishti ornalastyrý máselege aınaldy. Jurt Tóle bı dańǵylynyń boıyndaǵy «Astana» shaǵyn aýdanyndaǵy qalamger turǵan úıdiń, «Shahrıstandaǵy» jazýshy atymen atalatyn rýhanııat jáne tarıhtaný ortalyǵynyń, Y.Súleımenov kóshesiniń boıyndaǵy «Jastar alleıasy» jáne Jambyl dańǵylynyń boıyndaǵy Halyqaralyq Taraz ınnovasııalyq ınstıtýty jataqhanasynyń mańyna ornalastyrý kerek degen pikirdi jıi aıtty. Biz de ábden aqyldastyq. Nátıjesinde, komıssııa músheleriniń basym daýsymen Halyqaralyq Taraz ınnnovasııalyq ınstıtýty jataqhanasynyń aldyna qoıý týraly sheshim qabyldandy. Aldaǵy birer kúnde osy sheshim men úsh úzdik músinniń úlgisi Nur-Sultan qalasyndaǵy memlekettik komıssııaǵa jiberiledi. Naqty sheshimdi memlekettik komıssııa qabyldaıdy, – deıdi Muratbek Ázimov.
Endi memlekettik komıssııadan maquldaý týraly habar jetse, eskertkishtiń qurylys jumystary birden bastalady. Qysqasy ári ketse kúz mezgilinde Sheraǵanyń beınesi Jambyl dańǵyly №75 A mekenjaıynda qasqaıyp turatyn bolady.
Jambyl oblysy