Almatyda indet qaıta kúsheıip kele jatqanyn jaqyn adamdardyń aýyryp jatqanynan-aq bilip otyrmyz. О́kinishke qaraı, kún ótken saıyn kovıd juqtyrǵandardyń kórsetkishi kóterilip keledi. Mysaly, apta basynda, ıaǵnı 18 shilde kúni ótken bir táýlikte koronavırýs ınfeksııasyna 573 adam shaldyqsa, 19 shildede 597 adamnyń, 20 shilde kúni 650 almatylyqtyń indet juqtyrǵany anyqtaldy. Indetke qaıta shaldyǵyp jatqandar arasynda sımptomsyz naýqastarmen birge úı ishimen aýyryp jatqandar da bar.
Qazir júrip jatqan koronavırýs ınfeksııasynyń basty belgileri sýyq tıgen sııaqty tamaq jybyrlaý, bas aýyrý, tersheńdik pen álsizdik. Eger osy belgilerdiń bireýi mazalasa, ýaqyt ozdyrýdyń qajeti joq. Al sekvenırleý málimeti boıynsha, aınalymdaǵy eń basym shtamm – omıkron jáne onyń BA5 sýbvarıanty bolyp otyr. Onyń juǵýy tez, jyldam bolǵanymen, aýrýdyń ózi jeńil ótedi. Aýrý aǵymy ıntoksıkasııa sındromynyń joǵarylaýy turǵysynan ózgergen, biraq ókpe tarapynan belgiler az. Iаǵnı vırýs joǵarǵy tynys joldarynda shoǵyrlanǵan jáne ókpege az áser etedi. Biraq sodan keıin ıntoksıkasııa sındromy artyp, dene qyzýy kóterilip, qatty bas aýrýy, álsizdik, tamaq aýrýy sııaqty basqa belgileri baıqalady.
Sońǵy táýliktegi málimetterge sáıkes, Almatydaǵy ınfeksııalyq stasıonarlarda 216 syrqat emdelip jatyr. Jalpy, reanımasııa jáne qarqyndy terapııa bólimshesinde jaǵdaıy aýyr 1 naýqas bar. Munan da bólek BMSK men Telemedısına ortalyǵy dárigerleriniń baqylaýynda 3 297 naýqas baqylaýda tur, olardyń ishinde jeńil jáne jaǵdaıy ortasha 3 080, sımptomsyz 217 naýqas bar.
Epıdemııalyq ahýaldyń ózgerýine baılanysty Almaty qalasynda bir táýlik ishinde I komponentti 450 adam, II komponetti 703 adam vaksına alǵan. Revaksınalaýdan 1 971 adam ótti.
Ońtústik shaharda turǵyndardy vaksınalaý ótken jyldyń aqpan aıynan beri júrgizilip jatqany belgili. Sodan beri Almatyda I komponentti 1 233 401 adam, II komponentti 1 200 358 adam alǵan.
Búgingi tańda megapolıste Pfizer (Comirnaty) vaksınasyn alǵandar sany 117 999-ǵa jetti. Qazir qaladaǵy medısınalyq uıymdarda 85 vaksınalaý pýnkti jumys istep jatyr. 99 vaksınalaý brıgadasyna 313 medısına qyzmetkeri jumyldyryldy.
Dúnıejúzilik densaýlyq saqtaý uıymynyń Qazaqstandaǵy ókildigi vaksınalaý – qazirgi ýaqytta COVID-19 vırýsynyń barlyq aınalymdaǵy nusqalarynan, aýyr dert pen ólimnen qutqaratyn eń jaqsy qorǵanys bolyp qala beretinin alǵa tartýda. Sondyqtan vırýstyń taralýyn durys qadaǵalaıtyn, vırýs sıpattamalaryn ózgertetin mańyzdy genomdyq ózgeristerdi anyqtaıtyn senimdi ıntegrasııalanǵan baqylaý júıelerin jasaý kerek.
ALMATY