Memleket basshysynyń Jarlyǵy Aqordanyń resmı saıtynda jarııalandy, dep habarlaıdy Egemen.kz.
«Memleket basshysynyń Jarlyǵymen Gúlsara Mereıqyzy Arystanqulova Qazaqstan Respýblıkasynyń Fransýz Respýblıkasyndaǵy Tótenshe jáne О́kiletti Elshisi laýazymyna taǵaıyndaldy», delingen habarlamada.
Sondaı-aq Memleket basshysynyń Jarlyǵymen Jan Serjanuly Ǵalıev Qazaqstan Respýblıkasynyń Fransýz Respýblıkasyndaǵy Tótenshe jáne О́kiletti Elshisi laýazymynan, Qazaqstan Respýblıkasynyń Monako Knıazdigindegi Tótenshe jáne О́kiletti Elshisi, IýNESKO janyndaǵy Qazaqstan Respýblıkasynyń Turaqty ókili qyzmetin qosa atqarýdan bosatyldy.
Gúlsara Arystanqulova 1971 jyly 15 qazanda Jambyl oblysynda týǵan. Qazaq memlekettik álem tilderi ýnıversıtetin, «Bolashaq» baǵdarlamasy boıynsha Strasbýrg qalasynyń Gýmanıtarlyq ǵylymdar ýnıversıtetin jáne Qazaqstan Respýblıkasy Prezıdenti janyndaǵy Memlekettik basqarý akademııasyn bitirgen. Halyqaralyq qatynastar salasyndaǵy doktor.
Dıplomatııalyq qyzmetin 1998 jyly Qazaqstannyń Belgııadaǵy Elshiliginiń attashesi retinde bastady. QR SIM Ortalyq apparatynda TMD isteri jónindegi komıtettiń ekinshi, birinshi hatshysy, Halyqaralyq aqparat komıtetiniń basqarma basshysy laýazymdaryn atqardy. 2003-2007 jyldary Qazaqstannyń Fransııadaǵy Elshiliginde ekinshi, odan keıin birinshi hatshy bolyp jumys istedi.
2008 jyldan bastap Qazaqstan Respýblıkasy Prezıdenti Ákimshiliginiń Syrtqy saıasat ortalyǵynda konsýltant, sektor meńgerýshisi bolyp jumys istedi jáne Qazaqstannyń Fransııadaǵy Elshisi laýazymyna taǵaıyndalǵanǵa deıin QR Prezıdenti Ákimshiliginiń Syrtqy saıasat jáne halyqaralyq baılanystar bólimi meńgerýshisiniń orynbasary boldy.