Qazir elde aınalymda 58,54 mln bank kartasy júr eken. Sonyń 29,96 mıllıony belsendi paıdalanylady. Belsendi 10 kartanyń 9-y – debettik kartalar. Aıta keteıik, debettik karta dep otyrǵanymyz – kádimgi tólem jasaý, bankomattan aqsha sheship alý kezinde paıdalanylatyn bank kartasy. Kartanyń bul túri qandaı artyqshylyqqa ıe jáne bul turǵydaǵy bank usynystary qandaı?
Eldegi jıyrmadan astam banktiń 13-i ǵana debettik karta usynady. Sonyń ishinde tek 6 ekinshi deńgeıli bank qana óz kartalary boıynsha jyldyq tegin qyzmet kórsetedi. Olar – «Bank Hoým Kredıt» (Lite karta), «Bank SentrKredıt» (kartakarta), Forte Bank (ForteBlack), «Bank Frıdom Fınans» (Freedom Card), «Eýrazııalyq Bank» jáne Altyn Bank.
Ranking málimeti boıynsha, tegin aqsha sheship alý boıynsha eń úlken lımıt «Bank Hoým Kredıtte». Bul banktiń debettik kartasy arqyly táýligine – 2 mln, al aıyna – 60 mln teńge qarjy sheship alýǵa bolady. «Eýrazııalyq bank» lımıti: aıyna – 1 mln teńge. «Bank SentrKredıt», Forte Bank, «Bank Frıdom Fınans» lımıti: aıyna – 500 myń teńge. Altyn Bank lımıti: aıyna – 400 myń teńge.
Alty banktiń altaýy da bank ishinde kartadan kartaǵa aýdarym jasaý boıynsha komıssııa ustamaıdy. Biraq ózge banktiń kartasyna komıssııasyz aýdarym jasaý boıynsha lımıt bar. Eń úlken lımıt: «Bank Hoým Kredıt» kartasy arqyly basqa bank kartasyna aıyna 4 mln teńgeni komıssııasyz aýdarýǵa bolady. ForteBank pen «Bank Frıdom Fınans» arqyly aıyna 500 myń teńgeni ózge kartaǵa komıssııasyz aýdarýǵa múmkindik bar. Sondaı-aq BSK kartasymen ózge kartaǵa aıyna 200 myń teńgeni ǵana komıssııasyz jónelte alasyz. Altyn Bank ózge banktiń kartasyna aýdarym jasaý prosesin tek telefon nómiri arqyly ǵana múmkin etip qoıǵan.
Keshbekke keler bolsaq, qazirgi sátte «Bank Hoým Kredıt» mobıldi qosymsha arqyly kommýnaldyq qyzmetti, janarmaı quıý tólemin jáne sýpermarketterde saýda jasaǵan jaǵdaıda alǵashqy úsh aıda 10 paıyzǵa deıin keshbek beredi. Jalpy, BSK men BHK-niń kez kelgen kategorııasyndaǵy keshbek mólsheri 10 paıyzdy quraıdy. Al «Eýrazııalyq bank» – 30, Forte Bank 15 paıyzǵa deıin keshbek usynady. Biz qarastyryp otyrǵan alty banktiń beseýi (Forte-den basqalary) kepildendirilgen keshbek beredi. Kepildendirilgen keshbek «Bank Frıdom Fınansta» – 1,5, «Bank Hoým Kredıt» pen «Bank SentrKredıtte» – 1, «Eýrazııalyq Bank» pen Altyn Bank-te – 0,5 paıyz.
Jalpy, sońǵy bir jylda debettik karta sany 15,9 paıyzǵa ósken.