Konferensııalar lıgasynyń ekinshi irikteý kezeńindegi matchta «Astana» polshalyq «Rakývtan» taǵy da jeńilip qaldy dep habarlady Egemen.kz Prosports.kz-ke silteme jasap.
«Astana Arenadaǵy» qarymta kezdesý eshteńe sheshpeıtin edi. Sebebi Polshada ótken alǵashqy matchta «Rakýv» 5:0 esebimen jeńgen bolatyn.
Degenmen, jankúıerler astanalyq komanda qarymta kezdesýde jeńip, ÝEFA klýbtarynyń reıtınginde Qazaqstanǵa upaı syılaıdy dep sengen. Biraq polshalyqtar «Astana Arenadan» jeńispen qaıtty. Kezdesýdiń 16-mınýtynda ýkraınalyq fýtbolshy Vladıslav Kochergın alystan dál soqqy jasap, esep ashty. Bul oıyndaǵy jalǵyz gol boldy. Kezdesý barysynda elordalyqtardyń esepti teńestiretin múmkindigi bola qoıǵan joq.
Osylaısha, «Astana» bıylǵy eýrokýbokpen qoshtasqan alǵashqy qazaqstandyq klýb bolyp otyr. Komanda qatarynan úshinshi eýromaýsymda jarys jolyn erte aıaqtady.