Qorǵanys mınıstrliginde memlekettik qyzmettiń 93%-y elektrondy formatqa kóshirildi. Bul týraly Qorǵanys mınıstriniń orynbasary Darhan Ahmedıev Ortalyq kommýnıkasııalar qyzmetiniń alańynda aıtty, dep habarlaıdy Egemen.kz mınıstrliktiń baspasóz qyzmetine silteme jasap.
«Qazirgi ýaqytta Qorǵanys mınıstrligi sıfrlyq transformasııalaý strategııasyn ázirleýde. Jańa tehnologııalar memlekettik qyzmet kórsetý salasyn ǵana emes, áskerı basqarý men vedomstvoaralyq úılestirý júıesin de qamtyp otyr», delingen habarlamada.
Qorǵanys mınıstriniń orynbasary Darhan Ahmedıev sıfrlandyrý salasyndaǵy bes basymdyqty atady. Olar: «IT-ınfraqurylym jáne tehnologııalar», «Prosester men derekter», «Adamdar men daǵdylar», «Innovasııalar» jáne «Kıberqaýipsizdik».
Brıfıng barysynda spıker azamattarǵa aqparattyq júıelerdiń reınjenırıngi men cloud tehnologııalarǵa kóshý múmkindikterine nazar aýdardy. Derekterdi ıntegrasııalaý azamattardyń ártúrli anyqtamalar alý úshin memlekettik organdarǵa júginý qajettiligin boldyrmaýǵa múmkindik beredi.
Odan ózge bul áskerge shaqyrýdy keıinge qaldyrý jáne odan bosatý qyzmetin ala alatyn stýdentterge de qatysty. Múmkindigi shekteýli bolǵan jaǵdaıda azamattar birden áskerdegi qyzmetten bosatylady. Kóshi-qon jaǵdaıynda áskerı mindettiler men áskerge shaqyrylýshylardy áskerı esepke qoıý jáne odan shyǵarý qajettiligi de joıylady.
«Elektrondyq úkimet» qyzmeti arqyly tirkeý kýáligi de resimdeledi. Bul memlekettik qyzmetterdi kórsetýge kóshý resýrstaryn aıtarlyqtaı únemdep, jemqorlyq jasaý táýekelderin azaıtady.
Darhan Ahmedıevtiń aıtýynsha, áskerı basqarý organdarynda sıfrlyq qyzmetke ofıserler taǵaıyndalady. Olar konkýrs boıynsha iriktelip, vedomstvonyń biryńǵaı sıfrlyq damý saıasatynyń jolserigi jáne bastamashysy bolmaq.
Sonymen qatar ol Taldyqorǵan qalasynyń Avıasııalyq bazasynda iske asyrylatyn joba jaıly da aıtyp berdi. Onda jaqynda otandyq otyz IT-kompanııanyń top-menedjerleri bolyp qaıtty. Qyzmet jáne kommýnıkasııa prosesterin avtomattandyrý múmkindikterin zerttegennen keıin sıfrlyq ındýstrııa lıderleri 14 baǵytta sheshimder engizýdi usyndy.
Jalpy Qorǵanys mınıstriniń orynbasary Darhan Ahmedıev sıfrlyq transformasııalaý strategııasyn iske asyrý Qazaqstan áskeriniń jaýyngerlik ázirligi men jaýyngerlik qabiletin arttyrýǵa yqpal etetinin atap ótti.