Tekserý qorytyndysy: Jergilikti bılik nege asyǵys málimdeme jasady?

Egemen Qazaqstan gazetinde jarııalanǵan «Tumannan týǵan kúmán seıildi» taqyrybyndaǵy maqalada túsinikteme bergen «Qaz­fosfat» JShS bas ekology Arman Qaraǵalıev jaǵdaıdyń baqylaýda ekenin aıtqan edi. Oǵan habarlasqanymyzda: «Naq­ty ýaqyt rejimindegi avtomat­tandyrylǵan baqylaý júıesiniń kórsetkishteri boıynsha negizgi shyǵaryndylar kózinde (BGS bólimi) ftorıd sýteginiń ar­tyq mólsheri tirkelmegen. At­mos­feralyq aýadaǵy shekti ruqsat etilgen konsentrasııadan as­paı­tyn deńgeıdegi lastaýshy zattar turǵyndardyń densaýlyǵy­na jáne qorshaǵan ortaǵa áser etpeıdi», dep málimdeme jasa­ǵan da bolatyn.

Jambyl oblysy ákiminiń orynbasary Rústem Dáýlet te respýblıkalyq BAQ-ta «Qaz­gıdromet» keltirgen derek­ter­ge silteme jasaı otyryp, aýa­­ǵa zııandy zattar tara­maǵa­nyn, jumystyń der kezinde qolǵa alynýyna baılanysty turǵyndar densaýlyǵyna eshbir zııan joq ekenin aıtqan bolatyn. Árıne, oblys ákiminiń orynbasary mamandardyń sózine sengen bolýy múmkin. Alaıda oblys boıynsha ekologııa departamenti júrgizgen jospardan tys tekserý biraz máseleniń betin ashty. Soǵan qaraǵanda málimdeme jasaý turǵysynan jergilikti atqarýshy bılik asyǵystyq ta­nytqan sııaqty.

Departament basshysynyń min­detin atqarýshy Arsen Laty­povtyń aıtýynsha, tekserý qo­ry­tyndysy boıynsha bir emes, bes birdeı kemshilik anyqtalǵan.

«Sol oqıǵadan keıin qor­shaǵan ortaǵa keltirilgen zııan az bolǵan joq. Naqtyraq aıtar bolsaq, 1 tonna 92 kılogramm kúkirt aýaǵa tarap úlgerdi. Bul – sol on segiz mınýtta oryn alǵan jaǵdaı. Jalpy, anyqtalǵan bes kemshilik boıynsha seriktestik­ke 5 mln 641 myń 730 teńge aıyp­pul salyndy», dedi ol jaǵdaı­dy túsindirip.

Rasynda da, áýelde Mıne­raldy tyńaıtqyshtar zaýytynan taraǵan tútinnen halyq­qa eshqandaı zııan joq ekenin dálel­deýge tyrysqandar az bol­ǵan joq. Al Ekologııa depar­tamenti júrgizgen tekserý qo­ry­­­tyndysynda ekologııalyq zań­na­manyń bir emes, bes birdeı tar­maǵy boıynsha zańnama­nyń buzylǵany anyqtaldy. Kemshilikterdi joıý boıynsha nusqaýlyq berildi. Qysqasy, qoǵam úshin mańyzdy máselede asyǵys baılam jasamaý kerek. Sońy ne boldy? «Qorshaǵan ortaǵa eshqandaı zııany joq» degen áńgime endi, mine, shyndyqqa janaspaıtyny anyqtalyp otyr.

Jambyl oblysy