Bıyl Memlekettik komıssııa sheshimimen medısınalyq mamandyqtar boıynsha bilim alǵan 4,1 myń túlektiń 2,9 myńy dárigerler men orta medısına qyzmetkerleri tapshy aımaqtarǵa qyzmet etýge bólindi.
Medısınalyq joǵary oqý oryndaryn bitirgen 4 137 túlektiń 2 981-i óńirlerge bólindi. Onyń ishinde bakalavrıat – 116, ınternatýra – 2 644, rezıdentýra – 1 153, magıstratýra – 90, doktorantýra – 134. Al memlekettik bilim berý tapsyrysy aıasynda medısınalyq mamandyqtar boıynsha 2022 jyly oqýyn aıaqtaǵan 1 156 túlek «Bilim týraly» zańnyń 17-2 tarmaǵyna sáıkes memleket esebinen tegin oqý aqysyn eńbekpen óteý mindettemesinen bosatyldy (olardyń qataryna múgedektigi bar jandar, rezıdentýra, magıstratýra, doktorantýrada oqýyn jalǵastyrýshylar, júkti áıelder nemese úsh jasqa deıin balasy bar nemese balasyn jalǵyz ózi tárbıelep otyrǵandar, t.b. jatady).
«Aıta keterlik jaıt, jergilikti ákimdikter óńirlerge kadr tartý ári yntalandyrý maqsatynda aýyldyq jerge eńbek etýge kelgen jas mamandarǵa 100 AEK kóleminde kótermeleý qarjysyn tóleýdi qarastyrady jáne 1 500 AEK kóleminde úı alýǵa nemese úı qurylysyna bıýdjettik kredıt usynady. Sondaı-aq birqatar óńirde respýblıkalyq ne jergilikti bıýdjet qarajaty esebinen, medısınalyq uıymdardyń bıýdjetten tys qarjysy esebinen úı alýǵa bıýdjettik kredıt berý sekildi qosymsha áleýmettik qoldaý sharalary qarastyrylǵan», delingen Densaýlyq saqtaý mınıstrligi taratqan aqparatta.
Sonymen qatar jyl saıyn medısına mamandyqtaryna memlekettik bilim berý tapsyrys kólemi ulǵaıyp keledi. 2022 jyly shamamen 4 700 grant bólindi. Onyń ishinde bakalavr pen ınternderge – 2 700 oryn, rezıdentterge – 1 500 oryn, magıstranttarǵa – 325 oryn, doktoranttarǵa 160 oryn bólingen.