Qańtar oqıǵasy kezinde múlki búlingen kásipkerlerge zalaldy óteý maqsatynda memleketten alǵan aqshalaı kómegi tabys salyǵynan bosatylǵan. Bul týraly QR QM Memlekettik kirister komıtetinde málim etti, dep habarlaıdy Egemen.kz.
Komıtettiń habarlaýynsha, Qazaqstan Respýblıkasynyń 2022 jylǵy 11 shildedegi № 135-VII QR Zańymen Salyq kodeksine engizilgen ózgerister men tolyqtyrýlar tótenshe jaǵdaı kezeńinde keltirilgen múliktik zalaldy óteý kezinde salyq salý tártibin retteıdi.
Salyq kodeksiniń 241-baby 1-tarmaǵynyń jańa 28-tarmaqshasy shaǵyn jáne orta kásipkerlik sýbektisiniń tótenshe jaǵdaı kezeńinde keltirilgen múliktik zalaldy óteý úshin alǵan aqsha somasyn jyldyq jıyntyq tabystan alyp tastaýdy kózdeıdi. Bul norma ýaqytsha jáne 2022 jylǵy 1 qańtardan bastap 2023 jylǵy 1 qańtarǵa deıin qoldanysta bolady.
Sondaı-aq Salyq kodeksiniń 341-babynyń 1-tarmaǵynyń 17) tarmaqshasy tótenshe jaǵdaı kezeńinde keltirilgen múliktik zalaldy óteý túrindegi Qazaqstan Respýblıkasynyń zańnamasymen, jeke tabys salyǵy salynatyn kiristerden, bıýdjetten tólenetin tólemderden alyp tastaýdy kózdeıtin jańa abzaspen tolyqtyryldy. Túzetý 2022 jylǵy 1 qańtardan bastap qoldanysqa engizildi.
Osylaısha, zańdy tulǵalar men jeke kásipkerler – shaǵyn jáne orta bıznes sýbektileri tótenshe jaǵdaı kezinde keltirilgen múliktik zalaldy óteý úshin aqsha alǵan jaǵdaıda jyldyq jıyntyq kiristi túzetýge quqyly. Eger ákimshilik qurǵan komıssııanyń sheshimi bolyp, osy komıssııanyń tizilimine kásipker ense, osyndaı túzetýdi qoldana alady.