Oqý-aǵartý mınıstri Ashat Aımaǵambetov elorda mektepterin aralap, jańa oqý jylyna daıyndyq barysymen tanysty, dep habarlaıdy Egemen.kz.
«Qurylysy 2018 jyly bastalyp, áli kúnge deıin aıaqtalmaǵan mektepke bardym. Byltyr qala ákimdigi jobalyq-smetalyq qujattaryn rettep, nysan basqa merdigerge berilgen bolatyn. Qala ákimi orynbasarynyń aıtýynsha, Uly Dala men №39 kósheleriniń qıylysynda ornalasqan mektep bıyl jyl sońyna deıin paıdalanýǵa beriledi», dep jazdy mınıstr áleýmettik jelidegi paraqshasynda.
Sondaı-aq ol International School of Nur-Sultan jekemenshik mektebiniń qurylysy qalaı júrip jatqanyn kórdi. Qazir elimizde memlekettik mekteptermen qatar jekemenshik mektepter de belsendi túrde salynyp jatyr. Olarǵa memlekettik tapsyrystardy ornalastyrý esebinen oqýshy sany tolyp jatqan mektepterdi azaıtý jospary bar.
«Basqa mektepterdiń de jańa oqý jylyna daıyndyǵyn tekserdim. №71 mektep-lıseıinde boldym. Bilim ordasy oqýshylardy qabyldaýǵa daıyn. Jóndeý jumystary júrgizilgen, ınklıýzııa kabıneti jumys istep tur. Synyptardy, ashanany, kitaphanany, sport zalyn, jýynatyn bólmelerdi aralaǵanda ondaǵy áriptesterimmen áńgimelestim. Ásirese, mektep kitaphanashysynyń óz isine súıispenshiligi men adaldyǵy erekshe áser qaldyrdy. Oqýshylar kitaphanashylardyń eńbegin baǵalap, olardy oqyǵan kitaptarynyń sanymen qýantady dep úmittenemin», dedi Ashat Aımaǵambetov.
Mınıstr mektepke daıyndalyp jatqan bolashaq 1-shi synyp oqýshylarymen de júzdesti. Qoldanystaǵy zańnamaǵa sáıkes mektepterdi salýdy jáne jóndeý jumystaryn júrgizýdi ákimdikter júzege asyrady.
«Mektepterdiń jóndeý jumystary, qurylys sapasy men merzimine baılanysty kóptegen suraq bar. Sapany qamtamasyz etý bólimsheleriniń ókilderi qurylys-jóndeý jumystarynyń barysyna monıtorıng júrgizdi jáne tekseris eleýli kemshilikterdiń bar ekenin kórsetip otyr. Ákimdikterge shara qabyldaý úshin eskertýler joldandy», delingen mınıstrdiń habarlamasynda.