Álemniń 38-raketkasy, qazaqstandyq Iýlııa Pýtınseva Sınsınnatı (AQSh) WTA 1000 týrnıriniń ekinshi aınalymyna shyǵa almady, dep habarlaıdy Egemen.kz.
Qazaqstandyq tennısshi alǵashqy aınalymda álemniń 24-raketkasy, amerıkalyq Medıson Kızben sheberlik baıqasty.
Birinshi partııada amerıkalyq sportshy 7:5 esebimen basym tústi. Ol ekinshi sette de esesin jibermedi – 6:3.
Bir saǵat 23 mınýtqa sozylǵan kezdesýde Kız 6 eıs jasap, 4 breık-poınttyń úsheýin paıdalana bildi. Iý. Pýtınseva eıs te, breık te jasaı alǵan joq.
M. Kız ekinshi aınalymda álemniń 15-raketkasy, latvııalyq Elena Ostapenkomen kezdesedi. Ol osynyń aldynda Toronto jarysynyń fınalyna deıin jetken brazılııalyq Beatrıs Haddad Maııany tize búktirdi – 6:4, 6:4.
Qazaqstannyń birinshi raketkasy Elena Rybakına ekinshi aınalym kezinde reıtıngide kósh bastaǵan ıspanııalyq Garbıne Mýgýrýsamen kortqa shyǵady.