Balalar jyly aıasynda óńirde baldyrǵandarǵa jasalyp jatqan qamqorlyq az emes. Taıaýda ǵana Tarazdyń tóbesine qara tútin tóndirgen «Qazfosfat» JShS jurttyń narazylyǵyn týdyrǵanymen, seriktestikke qarasty taǵy bir mekeme birshama ýaqyt buryn balalardyń alǵysyn alyp úlgeripti.
Anyǵyraq aıtsaq, jaqynda ǵana «Qazfosfat» JShS ıeligindegi Qarataý taý-ken qaıta óńdeý keshenine qarasty «Juldyz» balalardy saýyqtyrý lageriniń úshinshi maýsymy jabyldy. Elimizde qalyptasqan epıdemııalyq ahýalǵa baılanysty lager jumysy eki jyl boıy toqtap qalǵan bolatyn. 2022 jyly lager jumysyn jandandyrý úshin aǵymdaǵy jóndeý jumystary júrgizildi.
«Bıyl biz balalardyń jaqsy demalýyna kúsh saldyq. Jalpy, demalýshylarǵa arnap bes mezgil daıyndalatyn as máziri bar, oıyn-saýyq keshenderi jetkilikti. Balalardyń jan-jaqty damýy úshin qoldan kelgen jumystardy atqaryp jatyrmyz. Birneshe úıirme jumys istedi. Eń bastysy, basseınimizdi talapqa saı jańǵyrttyq», deıdi lager dırektory Qarlyǵash Qanapına.
Onyń aıtýynsha, lager 3 maýsym boıy úzilissiz jumys istedi. Lagerdiń 14 kúnge sozylatyn birinshi maýsymyna 235 bala qabyldanǵan, sonyń ishinde ata-anasynyń qamqorlyǵynsyz qalǵan balalarǵa tegin joldama berilgen. Al ekinshi maýsymda 280 bala qabyldansa, onyń barlyǵy tolyq otbasynan shyqqandar. Úshinshi maýsymǵa 235 bala kelgen.
Aıta keteıik, jalpy «Qazfosfat» JShS bıyl balalarǵa arnalǵan barlyq is-sharalarǵa 130 mln teńge qarjy bólgen. Kelesi jyldyń sáýir aıynan bastap, lagerdi odan ári damytý maqsatynda sport keshenderin salý josparlanǵan. Sonymen qatar balalar oıyn alańy boı kótermek.
Jambyl oblysy