Buryndary nashaqorlyq dese, qolyna ıne salǵandar kózge elesteıtin edi. Qoǵam alǵa jyljyǵan saıyn keseldiń de túr-túri shyǵa bastady. Qazir tamaq aýyrsa soratyn «Mýkaltın» dárisi sııaqty esirtkiler jıi tárkilenetin bolǵan.
Búginde Nur-Sultan qalasynyń polıseıleri jastardy «dárihanalyq nashaqorlyqqa» tartý faktileriniń ulǵaıýyna baılanysty keshendi jumystardy jalǵastyrýda. Atap aıtsaq, elordalyq Polısııa departamentiniń qyzmetkerleri memlekettik organdar men úkimettik emes sektordyń belsendi qatysýymen halyq arasynda óskeleń urpaqty nashaqorlyqqa tartýdyń aldyn alýǵa baǵyttalǵan is-sharalar, sondaı-aq farmasevtıkalyq jáne medısınalyq qyzmet sýbektilerin tekserý boıynsha reıdtik is-sharalardy turaqty negizde ótkizip keledi.
Dese de eskertýge qulaq aspaıtyn aqpaqulaqtar az emes. Pysyqaı farmasevtter óz paıdasy úshin esirtkige táýeldi adamdar men jasóspirimderge qatty áser etetin medısınalyq preparattardy resepsiz satýdy jalǵastyrýda. Máselen, elordalyq Esirtki qylmysyna qarsy is-qımyl basqarmasynyń qyzmetkerleri Jangeldın jáne Syǵanaq kósheleriniń boıyndaǵy dárihanalarda jedel-aldyn alý is-sharalaryn júrgizgen kezde dárilik preparatty dárigerdiń resebinsiz bosatý faktilerin anyqtady. Jeke kásipker ıesine qatysty Ákimshilik quqyq buzýshylyq týraly kodekstiń 426-babynyń 2-bóligi boıynsha ákimshilik is qozǵaldy. Sot qaýlysymen dárihanalardyń qyzmetin 6 aı merzimge toqtata turý túrindegi jaza taǵaıyndaldy.
Osyǵan uqsas oqıǵa Moldaǵulova kóshesindegi dárihanada da anyqtaldy, onda sot sheshimi boıynsha 199 095 teńge somasynda aıyppul túrinde jaza taǵaıyndaldy. Jyl basynan beri polısııa qyzmetkerleri Densaýlyq saqtaý mınıstrligi Medısınalyq jáne farmasevtıkalyq baqylaý komıtetiniń Nur-Sultan qalasy boıynsha departamenti mamandarymen birlesip Ákimshilik quqyq buzýshylyq týraly kodekstiń 426-baby (Farmasevtıkalyq qyzmet jáne dárilik zattar, medısınalyq maqsattaǵy buıymdar aınalysy salasynyń qaǵıdalaryn buzý) boıynsha 7 faktini anyqtaǵan.