Temirtaý qalasyndaǵy Metallýrgter dańǵyly boıyndaǵy №5/2 úıde gaz-aýa qospasynyń tutanýy saldarynan úsh birdeı páterge aıtarlyqtaı zaqym keldi. Tórt adam zardap shegip, 53 adam qaýipsiz jerge kóshirildi.
Oqys oqıǵa bolǵan jerge Qaraǵandy oblysy ákiminiń orynbasary Vadım Basın, Temirtaý qalasynyń ákimi Qaırat Begimov bardy. Shuǵyl qyzmet túrleri de jedel jetti. Tutanýdyń saldarynan bolǵan órt sóndirilip, qutqarýshylar qulaǵan qabyrǵalardyń úıindilerin tazartý boıynsha jumystardy uıymdastyrdy.
Tótenshe jaǵdaılar jónindegi departament habarlaǵandaı, oqıǵa kúndiz saǵat 12.00-diń shamasynda bes qabatty úıdiń úshinshi qabatynda bolǵan eken. Gaz-aýa qospasynyń tutanýynan keıin dúmpý bolyp, páteraralyq qabyrǵalar men astyńǵy jáne ústińgi qabataralyq plıtalar qulaǵan.
Dúmpýdiń kúshti bolǵany sonsha, 12 páterdiń terezeleri men syrtqy esikterine ishinara zaqym kelgen. Al zardap shekken tórt adamnyń úsheýi búginde aýrýhanadan shyǵyp, tek bireýi ǵana dárigerlerdiń baqylaýynda jatyr.
Temirtaýdaǵy tótenshe oqıǵa boıynsha jedel shtab quryldy. Ol oqıǵanyń sebep-saldaryn anyqtaıtyn bolady. Al qala ákimi turǵyndarmen kezdesip, zaqymdanǵan páterlerdi qalpyna keltirý jáne kóshirilgen adamdardy ýaqytsha ornalastyrý boıynsha qoldan kelgen kómektiń bári jasalatynyna ýáde berdi.
Qaraǵandy oblysy,
Temirtaý qalasy