Tahıkardııa dertine shaldyqqan balalardyń qatary jyl ótken saıyn artpasa, azaıar emes. Balasynyń júrek qaǵysy qalyptan tys joǵarylaǵan kezde ata-ana baıyz tappaı ketedi. Jaqynda Jambyl oblystyq kópsalaly balalar aýrýhanasyna Shý qalasynan sanavıasııa jelisi boıynsha 13 kúndik sábı jetkizildi. Ábigerge túsken dárigerler tıisti sharalardy der kezinde qabyldap, perishteniń ómirin saqtap qaldy.
Baldyrǵannyń anasy dárigerlerge balanyń tynysy sońǵy eki kún bederinde qatty ózgergenin, keýde tusy syzdap, mazasyzdanyp ketkenin baıqaǵanyn baıandaǵan. Ýchaskelik dárigerge barǵannan keıin anasy men balasy turǵylyqty jeri boıynsha aýrýhanaǵa jatqyzylǵan. Ortalyq aýdandyq aýrýhananyń stasıonarynda sábıdiń tamyr soǵýy mınýtyna 260 KD deıin jetken. Beıkúná sábıge shuǵyl túrde kómek kórsetý úshin sanavıasııamen JOMDB anestezıologııa, reanımasııa jáne qarqyndy terapııa bólimshesiniń meńgerýshisi Qýandyq Ámirequlov barǵan. Shuǵyl kómek kórsetilgennen keıin tikushaqpen oblystyq sanıtarlyq avıasııa jelisi boıynsha oblys ortalyǵyna jetkizildi. Munda JOMDB somatıkalyq korpýsynyń reanımasııa bólimshesine jatqyzyldy. Ondaǵy dárigerler tıisti kómektiń bárin kórsetti.
Qabyldaý kezinde dágirerler balanyń júrek yrǵaǵynyń baıaýlap, tynys alýynyń buzylýyna baılanysty jaǵdaıynyń kúrt nasharlap ketkenin ańǵarǵan. Esin joǵaltqan sábıdiń júrek qaǵysy qatty ózgergen. Tipti jıiligi mınýtyna 254-260 márte soqqan. Jaǵdaıdyń ýshyǵa túskenin túsingen aq jeleńdi jandar qol qýsyryp otyrmady. Shuǵyl túrde bas dárigerdiń orynbasarynyń, reanımasııa bóliminiń meńgerýshisi Qýandyq Ámirequlovtyń, neonatolog dáriger Shynar Hambarovanyń, balalar kardıology Irına Lıdiń qatysýymen konsılıým ótti.
Nátıjesinde, jańa týǵan nárestege Ch2a paroksızmaldy tahıkardııa, júrek yrǵaǵynyń buzylýy dıagnozy qoıylyp, konsılıým sheshimimen arıtmııaǵa qarsy preparatty EKG baqylaýymen tıtrleý bastaldy.
Telemedısınanyń kómegimen ulttyq ǵylymı kardıohırýrgııa ortalyǵynyń (Nur-Sultan qalasy) balalar kardıologııasy bóliminiń meńgerýshisi Almıra Baıqalkanovamen keńes ótkizildi. Júrek soǵý jıiligi joǵary bolǵandyqtan, balaǵa sınhrondalǵan kardıoversııa jasaldy. Sonyń nátıjesinde onyń júrek soǵý jıiligi qalpyna keldi.
Bul dertti der kezinde baıqamasa, sábı ómirine úlken qaýip tónetini aıtpasa da túsinikti.
«Balalarda júrek soǵý jıiligi jas erekshelikterine qaraı bólinedi. Jańa ǵana dúnıege kelgen nárestelerde kúndik norma mınýtyna 123-159 soqsa, 1-2 aılyq kezinde – 121-179, 1-2 jasta – 89-150, 5-7 jasta – 65-133, 12-15 jasta mınýtyna 60-119 soǵýy kerek.
Júrektiń patologııalyq tahıkardııasy adam balasyn qatty alańdatyp, basqa kúrdeli aýrýdyń belgilerin baıqatady. Náreste óte jıi tynys alyp, boıynda uıqyqumarlyq nemese tynyshtyq paıda bolsa jáne tamaqtanýdan bas tartý sııaqty belgiler baıqalsa, onda biz aıtyp otyrǵan aýrý túrine shaldyǵýy ábden múmkin. Al eresek balalarda aýrý belgileri múldem bólek. Olarda qan qysymy tómendep, álsizdik paıda bolady jáne teriniń túsi kók, bozǵylt nemese qyzaryp, zár shyǵarýy qıyndaıdy.
Tahıkardııanyń paroksızmi adam aǵzasy úshin óte qaýipti ekeni belgili. Onyń kenetten bastalyp, aýrý belgileri jyldam tarap, sońy qaıǵyly jaǵdaıǵa ulasatyn kezder de ushyrasady. Jedel medısınalyq kómek bolmasa, kardıogendi shokpen, júrek-ókpe jetkiliksizdigimen qalypqa keltiriledi. Paroksızmaldy arıtmııanyń sozylmaly aǵymynda, qurylymdyq kardıopatologııa arıtmogendik nemese keńeıtilgen kardıomıopatııa túrinde qalyptasady. Uzaq qan aınalymynyń buzylýy balanyń ósýi men fızıkalyq damýyn baıaýlatady. Emdeý naýqastyń jaǵdaıyna jáne tahıkardııanyń etıologııasyna baılanysty», deıdi Jambyl oblystyq kópbeıindi balalar aýrýhanasy bas dárigeriniń emdeý isi boıynsha orynbasary Seıdahmet Shynybekov.
13 kúndik sábı JOMDB-da 5 kúnge jatqyzyldy. Der kezinde kórsetilgen kómektiń nátıjesinde júrek soǵý jıiligi 138-140 aralyǵynda boldy. Áıtkenmen ara-tura paroksızmaldy tahıarıtmııanyń shabýyldary qaıtalanypty. Joǵary mamandandyrylǵan medısınalyq kómek kórsetý úshin balany respýblıkalyq medavıasııa jelisi boıynsha UǴKO-ǵa 4-deńgeıde tasymaldaǵan. Bul medısınalyq mekemede tolyq tekserýden ótkennen keıin «júrek yrǵaǵynyń buzylýy», «paroksızmaldy qarynshalyq», «tahıkardııa» dıagnozy qoıylǵan.
Eki apta boıy balanyń ómiri úshin balalar kardıologııasy bóliminiń meńgerýshisi Almıra Baıqalkanova jáne balalar arıtmologııasy bóliminiń meńgerýshisi Aıan Abdrahmanovtyń basshylyǵymen túrli mamandyqtaǵy dárigerler kúres júrgizgen. Dınamıkalyq baqylaý jáne zamanaýı tehnologııalardy qoldana otyryp emdeýdiń nátıjesinde jaǵdaı turaqtanǵan. Balanyń tynys alýy qalypty deńgeıge jetkizilgen. Naqtyraq aıtar bolsaq, tynys alý jıiligi mınýtyna 22 tynys, júrektiń soǵý jıiligi mınýtyna 105 soqqyny quraǵan. Nátıjesinde, jaǵdaıy turaqtalǵan kishkentaı naýqas turǵylyqty jeri boıynsha kardıologtyń baqylaýymen úıge shyǵaryldy. Qazirgi tańda balanyń jaǵdaıy qalypty.
«Sońǵy jaǵdaıǵa keler bolsaq, dárigerlerdiń der kezinde iske kirisýi arqyly barlyq másele sheshimin tapty. Jalpy, mundaı dert paıda bolǵan kezde ata-analar dárigerlerge jedel júgingeni abzal», deıdi S.Shynybekov.
Jambyl oblysy