Nur-Sultan qalasynyń ákimi Altaı Kólginov elordalyqtardy oqý jylynyń bastalýymen quttyqtady, dep habarlaıdy Egemen.kz qala ákimdiginiń resmı saıtyna silteme jasap.
«Ustazdardy, oqýshylardy, ata-analardy oqý jylynyń bastalýymen quttyqtaımyn! Elordada bıyl 1-synypqa 26 myńnan asa bala barady. Oqýshylardyń moınyna jaýapty mindet júkteledi – baǵa úshin emes bilim alý úshin oqý qajet. Jan-jaqty damyǵan adam bolýdyń mańyzy zor. Bilim alýǵa ǵana emes sportqa da kóńil bólý kerek.
Mektep qabyrǵasynda oqyǵan jyldary bilim qoryn jınaqtaý qajet, ol keıinnen eresek ómirde de paıdaly bolmaq. Eńbek pen bilim arqyly ǵana úlken jetistikke jetýge, bıik shyńdardy baǵyndyrýǵa bolady», dedi ákim.
Onyń aıtýynsha, bıylǵy oqý jylynda 11 mektep paıdalanýǵa beriledi, olardyń bir bóligi ashylǵan. 11 mektepte 23 myńnan astam oqýshy bilim alady.
«Memleket basshysynyń tapsyrmasy boıynsha oqý oryndarynyń sanyn arttyrý jumysy júrip jatyr. Kelesi jyly taǵy 20 mekteptiń qurylysyn bastaımyz. Al iri mektepterdiń qurylysyna kezeń-kezeńimen kóshemiz. Iаǵnı bir oqý orny 4 myń oqýshyǵa (2 aýysymda) arnalatyn bolady. Elordada 3 jyl ishinde 34 mektep salyndy. Osylaısha 70 myń oqýshy orny ashyldy», dedi ol.
Sondaı-aq ol elordada mektep salý úshin 72 jer telimi bólingenin sóz etti. Osy jer ýchaskeleriniń aýmaǵy 240 myń oqýshyǵa (2 aýysymda) arnalǵan oqý oryndaryn salýǵa múmkindik beredi.
«Bul jer ýchaskeleri áleýmettik nysandarǵa degen qajettilikti eskere otyryp, qalanyń barlyq aýdanynda belgilengen. Áleýmettik nysandar qurylysyna arnalǵan jer telimderiniń sanyn jyl saıyn kóbeıtetin bolamyz. Oqý jylynyń bastalýy qutty bolsyn! Myqty densaýlyq, tabys jáne bilim alýǵa degen zor qulshynys tileımin! О́zińizge jáne kúshińizge senińiz!», dep jazdy qala basshysy áleýmettik jelidegi paraqshasynda.