«Qazaqstan barysy» týrnıriniń tórtinshi maýsymyna irikteý jalǵasýda. Jaqynda Qyzylorda oblysynan fınalǵa joldama alǵan balýandar anyqtaldy. Bul týraly egemen.kz tilshisi habarlady.
Qyzylorda oblysynan bıylǵy týrnırdiń fınaldyq kezeńine Rýslan Ábdirazaqov pen Aıbek Serikbaev qatysady. Qazir ekeýi de daıyndyqty bastap ketti. Rýslan bıylǵy irikteý týrnırinde babynda ekenin kórsetti. Endi ol fınaldyq synda bap pen baq kelisse deıdi. Al onyń baýyry 2011 jylǵy «Qazaqstan barysy» Ulan Rysqul jaraqatynyń kesirinen bıylǵy irikteýden óte almady.
Bıylǵy irikteý týrnırinde Qyzylorda oblysy balýandarǵa bar jaǵdaıdy jasady. Al oblystyq jarystyń sońynda jeńimpaz balýandarǵa tipti, aqshalaı syıaqy da tabys etti. Oblys basshylyǵy birinshi oryn alǵan Rýslan Ábdirazaqovqa 1 550 000 teńge, Aıbek Serikbaevqa 850 000 teńgeni ustatty. Bul ekeýi de «Qazaqstan barysynyń» fınalyna ekinshi ret qatysqaly otyr.
-Jeńiske jetkenim úshin qýanyshtymyn. Bul jeńis maǵan ońaı kelgen joq. Bir jyl burynǵy jaraqatym áli tolyqtaı jazyla qoıǵa joq. Áli kúnge deıin syr berip turady. Biraq, bıyl meni eshteńe de toqtatpaıdy. Qudaı qalasa, bar kúshimdi salyp chempıon atanǵym keledi, - deıdi Rýslan.
Rýslan Ábdirazaqovtyń laqap aty - «Syr barysy».
Boıy: 197 sm.
Salmaǵy: 117 kg.
Týǵan jyly: 1988 jyl.
Sporttyq ataǵy: qazaq kúresinen sport sheberi.
Jattyqtyrýshysy: Sadyq Mustafaev.
Al Syr óńirinen fınaldyq synǵa qatysaty ekinshi balýan – Aıbek Serikbaevtyń laqap aty - «Syr arlany». Onyń boıy 190 sm, salmaǵy 103 kg. Aıbek 1993 jyly týǵan. Qazaq kúresinen sport sheberi, jattyqtyrýshysy - Ádilbek Serikbaev.
Dastan Kenjalın.
Derekkóz: «Qazaqstan barysy» qazaq kúresin damytý qorynyń baspasóz qyzmeti.
Foto: Qazaqstan barysy» qazaq kúresin damytý qorynyń baspasóz qyzmeti.