ASTANA. 14 mamyr. Úkimet basshysynyń birinshi orynbasary Baqytjan Saǵyntaev Qazaqstan men Qytaı balamaly energııa kózi boıynsha ózara yntymaqtastyq máselesin talqylaıdy dep málimdedi. Bul týraly ortcom.kz habarlady.
Ortalyq kommýnıkasııalar qyzmetinde ótken brıfıngte Baqytjan Saǵyntaev Qytaı halyq respýblıkasy Qazaqstannyń EKSPO-2017 ótkizýine qoldaý bildiretinin jetkizdi.
Sonymen qatar, ol eki eldiń ekonomıkalyq baılanystaryn damytý turǵysynda áńgime órbite kele, munaı-gaz salasyndaǵy birlese atqarylyp jatqan jumystardyń júıeli túrde júrgizilip otyrǵanyna toqtaldy.
Úkimet basshysynyń birinshi orynbasary: «Edeýir kólemdegi baza quryldy. «Beıneý-Bozoı-Shymkent» gaz qubyrynyń qurylysy týraly kelisim jasaldy, jobanyń ekinshi kezeńin qarjylandyrý máselesi sheshildi, sondaı-aq, «Qazaqstan-Qytaı» munaı qubyrynyń ekinshi kezeginiń qurylysy bastaldy», – dedi.
Baqytjan Saǵyntaevtyń keltirgen derekterine qaraǵanda, osy jyldyń basyna qaraı elimizge Qytaı tarapynan quıylǵan ınvestısııa kólemi 20 mlrd. dollardan asqan. Onyń 5,68 mlrd. dollary tikeleı ınvestısııa. 2013 jyly ekijaqty saýda kólemi 22,5 mlrd. dollarǵa jetken. Munyń 14,3 mlrd. dollary eksport bolsa, 8,1 mlrd. dollary ımport.
Joldybaı Bazar.
Derekkóz: ortcom.kz.
Foto: ortcom.kz.