Qazaqstandyq delegasııa Máskeýde ótken aqparattyq qaýipsizdik máseleleri jónindegi áskerı-ǵylymı konferensııaǵa qatysty. «Áskerı salada aqparat qaýipsizdigin qamtamasyz etý» taqyrybyndaǵy bul jıyn UQShU Birikken shtabynda ótti.
UShQU Ujymdyq qaýipsizdik júıesiniń kúshteri men quraldaryn basqarý organdary jáne quralymdaryn birlesip daıarlaýdyń 2022 jylǵa arnalǵan josparynda áskerı-ǵylymı konferensııany ótkizý reglamenttelgen.
Is-sharaǵa UQShU-ǵa múshe elder qorǵanys vedomstvolarynyń aqparattyq qaýipsizdigin qamtamasyz etý salasynyń mamandary, bazalyq oqý-ádistemelik uıymdardyń, Hatshylyq pen Birikken shtabtyń ókilderi qatysty.
Qazaqstandyq delegasııany Memlekettik qupııalardy qorǵaý departamentiniń basshysy, polkovnık Ilnýr Bısembaev basqaryp bardy.
Ol sóılegen sózinde UQShU-ǵa múshe memleketterdiń qatysýymen semınarlar, tehnologııalyq jattyǵýlar, oqý-jattyǵýlar, zerthanalyq jumystar túrinde praktıkalyq jáne tehnıkalyq baǵyttaǵy birlesken is-sharalardy turaqty túrde ótkizý qajet ekenin atap ótti. Sonymen qatar aqparat qaýipsizdigine qatysty barynsha ózekti qaýip-qaterler men olarǵa qarsy is-qımyl sharalary týraly málimet almasýdy turaqty túrde iske asyrýdy jolǵa qoıǵan jón dedi.
Plenarlyq otyrysta konferensııaǵa qatysýshylar aqparat qaýipsizdigine tónetin qaýip-qater tóńiregindegi máselelerdi de qarastyrdy. Odan ózge ulttyq qarýly kúshterde aqparattyń saqtalýy men qorǵalýyn qamtamasyz etýde UQShU-ǵa múshe memleketter osy baǵyttaǵy jumysty jetildirý jaıly tájirıbe jınap, pikir almasty.
Konferensııanyń nátıjeleri boıynsha qatysýshylar áskerı salada aqparat qaýipsizdigin qamtamasyz etýdiń asa ózekti ekenin atap ótip, ózara is-áreketti jetildirý jóninde usynystar pysyqtaldy.