AQTAÝ. 14 mamyr Mańǵystaý oblysynyń ortalyǵyndaǵy 22-shaǵyn aýdanda 12 mamyr kúni keshki saǵat 20.00 shamasynda 8 jasar uldy belgisiz bireý pnevmatıkalyq qarýmen atyp ketti. Bul týraly egemen.kz tilshisi habarlady.
Keýde tusynan aýyr jaraqat alǵan bala oblystyq aýrýhananyń jansaqtaý bólimine jetkizilip, bir jarym saǵatqa sozylǵan kúrdeli otadan soń aman-saý qaldy. Qazir aýrýhananyń hırýrgııa bólimine aýystyryldy.
Al polıseılerdiń qylmyskerdi shuǵyl izdestirý sharalary ázirge nátıje berer emes. Oblystyq ishki ister departametiniń baspasóz hatshysy Á.Shermaǵanbetovanyń habarlaýynsha, oqıǵaǵa qatysty Qylmystyq kodekstiń 257-baby 3-bóligine saı qylmystyq is qozǵalyp, ballıstıkalyq saraptama taǵaıyndalǵan.
Oq kórshi úıdiń balkonynan atylǵan bolýy múmkin dep joramal jasap otyrǵan polıseıler ballıstıkalyq saraptama qorytyndysynan nátıje kútedi. Al zárezap bolǵan turǵyndar 8 jasar uldyń alǵashqy japa shegýshi emes ekenin, sońǵy úsh aptada úsh adamnyń oq tıip, jaraqat alǵanyn, biraq olardyń quqyq qorǵaý oryndaryna habarlaspaǵandyǵyn aıtýda.
Gúlaıym Shyntemirqyzy.
Derekkóz: egemen.kz.
Foto: lada.kz.