О́skemende №1 Halyq qaharmany, Táýelsiz Qazaqstannyń tuńǵysh Qorǵanys mınıstri armııa generaly Saǵadat Nurmaǵambetovke arnalǵan monýment pen gúl baǵy ashyldy, dep habarlaıdy Egemen.kz QR Qorǵanys mınıstrliginiń baspasóz qyzmetine silteme jasap.
Eskertkishtiń ashylý saltanatyna Shyǵys Qazaqstan oblysynyń ákimi Danıal Ahmetov, Qorǵanys mınıstriniń orynbasary general-leıtenant Rýslan Shpekbaev, О́skemen garnızonynyń áskerı qyzmetshileri, Qarýly kúshterdiń ardagerleri, qoǵam ókilderi, sondaı-aq batyrdyń nemeresi Lıra Nurmaǵambetova qatysty.
«Uly dalamyz árqashan qaýipsizdikti senimdi qamtamasyz etip, qaharmandyq pen patrıotızmdi pash etetin laıyqty batyr uldarymen áıgili. Jastarymyz Saǵadat Qojahmetuly Nurmaǵambetov sııaqty batyrlardy úlgi tutyp ósýi tıis. Sol sebepti de biz úshin urpaqtar sabaqtastyǵy asa mańyzdy», dep atap ótti Qorǵanys mınıstriniń orynbasary general-leıtenant Rýslan Shpekbaev.
Uly Otan soǵysy jyldarynda Saǵadat Nurmaǵambetov Krasnodar ólkesin, Ýkraınany, Moldavııany, Batys Belorýssııa men Polshany azat etýge qatysty. Polsha aýmaǵynda jaýdyń qorǵanysyn buzyp ótýde qolbasshylyqtyń jaýyngerlik tapsyrmalaryn buljytpaı oryndaǵany, sonymen birge kórsetken erligi men qaharmandyǵy úshin oǵan Keńes Odaǵynyń Batyry ataǵy berildi.
«Táýelsizdik tańynda Saǵadat Nurmaǵambetov jas memlekettiń Qarýly kúshterin quryp, qorǵanys qabiletin nyǵaıtty. Elimizde ásker bolmaǵan kezeńde orasan zor bedeli men kásibı sheberliginiń arqasynda komandalyq quramdy, tehnıkalyq bazany saqtap, Qarýly kúshterdiń qurylymyn qalyptastyryp, áskerı qyzmetshilerdiń patrıottyq rýhyn kótere aldy», dep atap ótti Shyǵys Qazaqstan oblysynyń ákimi Danıal Ahmetov.
Bul eskertkish qaharmandyq pen Otanǵa adal adamǵa arnalǵan qurmet. Saǵadat Qojahmetuly Nurmaǵambetov Qarýly kúshterdiń qalyptasýy men damýyna ólsheýsiz úles qosqan daryndy memleket qaıratkeri jáne myqty qolbasshy retinde eldiń esinde qalǵan ańyz adam.