Elordada ótip jatqan Álemdik jáne dástúrli dinder kóshbasshylarynyń VII sezi aıasynda «Astana Opera» teatrynda «Birligimiz – áralýandyqta» atty mazmundy baǵdarlamaǵa toly konsert ótti.
Álemniń ár túkpirinen kelgen mártebeli meımandar elimizdegi biregeı óner ordasynyń klassıkalyq kórkem sáýletin kórip, erekshe áser aldy. Aldymen sahnaǵa kóterilgen Qazaqstannyń eńbek sińirgen qaıratkeri Nurbolat Arzamas pen halyqaralyq baıqaýlardyń laýreaty Jaqsykeldi Maıasarov ulttyq naqyshqa baı dástúrli ánderdi shyrqap, halqymyzdyń ónerin pash etti. Al daryndy skrıpkashy, P.I.Chaıkovskıı atyndaǵy halyqaralyq baıqaýdyń laýreaty Aqbıke Alǵı Djon Ýılıamstiń «Shındler tizimi» kınofılminen alynǵan «Joǵalǵan jumaq» shyǵarmasyn oryndap, tyńdarmandardy tolqytty. Aıta keteıik, tanymal kompozıtor holokost kezinde myńnan astam polshalyq evreılerdi ólimnen qutqarǵan Oskar Shındler jaıly osy fılmge mýzyka jazǵany úshin «Oskar» men «Gremmı» syılyǵyn qatar alǵan.
Sondaı-aq Qazaqstannyń eńbek sińirgen qaıratkerleri, solıster Azamat Jyltyrkózov pen Bıbigúl Januzaq teatrdyń hory jáne sımfonııalyq orkestrimen birge Ahmet Jubanov pen Latıf Hamıdıdiń «Abaı» operasynan «Toıbastardy» oryndap keshtiń kórigin qyzdyrsa, Qazaqstannyń eńbek sińirgen qaıratkeri Jámıla Jarqymbaeva Dj.Kachchınıdiń mýzykanttardyń máńgilik shabytyna aınalǵan Ave Maria shyǵarmasyn usyndy. Halyqaralyq baıqaýlardyń laýreaty Elena Ganja «Bıkesh toǵaıda serýen qurdy» atty polıaktiń halyq ánin tamyljytyp shyrqap, jurtshylyqty jyly áserge bóledi.
Sonymen qatar atalǵan teatrdyń bas hormeısteri, Qazaqstannyń eńbek sińirgen qaıratkeri Erjan Dáýitovtyń jetekshiligimen «Astana Opera» hory P.I.Chaıkovskııdiń «Evgenıı Onegın» operasynan «Sharýalar horyn» tartý etse, al «Astana Opera» balalar hory Ahmet Jubanovtyń «Aq kógershin» týyndysyn naqyshyna keltire oryndap, beıbitshilikti dáriptegen ánniń baıraǵyn bıikke kóterdi. Sondaı-aq dombyrashylar ansambliniń «Kúı shashý» popýrrıi, M.Abdýdyń Aqrab El Nas-yn usynǵan «Astana sazy» ansambli men orkestriniń shyǵarmalary da shynaıylyǵymen tánti etse, «Astana Balet» teatrynyń «Arýlar sherýi» men respýblıkalyq akademııalyq koreı teatrynyń «Sambýk» horeografııalyq kompozısııasy da kórermenderdi beıjaı qaldyrmady. Ásirese «Máńgilik el», «Ádemi-aý», «Kontrast», «Vaınah», Koreı teatry sekildi bes bı ansambli birigip qoıǵan «Birligimiz – áralýandyqta» horeografııalyq kompozısııa – osy konserttiń negizgi sımvolyna aınaldy.
Ásem sazdy kesh sońynda sahnaǵa qazaq ónerin álemge tanytyp júrgen daryndy ánshi Dımash Qudaıbergen shyǵyp, ol mýzykasyn ózi jazǵan The story of one sky atty ánin keń tynysty kórkem daýysymen shyrqap, konsertke kelgen qaýymnyń ystyq yqylasyna bólendi. Qysqasy, mazmundy baǵdarlamaǵa toly mýzykalyq kesh mártebeli qonaqtardyń aldynda qazaqtyń ǵana emes, elimizde turyp jatqan barlyq halyqtyń ónerin asqaqtatty.